Монгол Улсын Засгийн газраас 2023-2025 оныг “Монголд зочлох жил” болгон зарласан.  Энэ хүрээнд манай улс үзэсгэлэнт байгаль, уламжлалт нүүдлийн соёлыг дэлхийд таниулах, Монгол Улсын эдийн засгийг солонгоруулах бодлого барьж буй.

Монголд эдийн засгийн бүтцийг тодорхойлох үндсэн салбаруудад аялал жуулчлал, тээвэр ложистикийн салбар чухал үүрэгтэй. Учир нь, “Монголд зочлох жил”-ийн хүрээнд манай улс 2024 онд 1 сая, 2030 онд 2 сая жуулчин хүлээн авах зорилтыг дэвшүүлэн ажиллаж байна.  Үүнд, тээврийн салбарын үйлчилгээ чухал үүрэг гүйцэтгэнэ.

Тиймээс Зам, тээврийн яам болон Аялал жуулчлалын мэргэжлийн холбооны зүгээс санаачлан “Монгол Улсын аялал жуулчлалын салбар дахь тээврийн үйлчилгээний өнөөгийн нөхцөл байдал, цаашид авч хэрэгжүүлэх арга хэмжээ” сэдэвт хэлэлцүүлгийг энэ сарын 4-нд ЗТЯ-ны хурлын танхимд зохион байгууллаа.

 Хэлэлцүүлэгт Зам, тээврийн яам, Соёл, спорт, аялал жуулчлал, залуучуудын яам, Иргэний нисэхийн ерөнхий газар, “МИАТ” ТӨХК, Улаанбаатар төмөр зам ХНН, Авто тээврийн үндэсний төв ТӨҮГ, “Чингис хаан” олон улсын нисэх буудлын менежментийг хэрэгжүүлэгч “НУБИЭ” ХХК, “Хүннү Эйр” ХХК, “Изинис Эйрвэйз” ХХК, “Аэромонголиа” ХХК, “Гэбэт” ХХК, “Рийм Хайнзан” ХХК, Аялал жуулчлалын мэргэжлийн холбоо, “Монголын агаарын тээвэрлэгчдийн холбоо” ТББ, “Монголын олон улсын агаарын тээврийн гишүүн агентуудын холбоо” ТББ-ын төлөөллүүд оролцсон юм.  

Зам, тээврийн яамны Төрийн нарийн бичгийн дарга С.Батболд хэлэлцүүлгийг нээж хэлсэн үгэндээ аялал жуулчлалыг хөгжүүлэхэд зам тээврийн салбар, тэр дундаа тээврийн үйлчилгээ чухал үүрэгтэйг онцлоод зам тээврийн салбарт хэрэгжиж буй төсөл хөтөлбөрүүд,  цаашид хэрэгжүүлэхээр төлөвлөж буй ажлуудаа танилцууллаа.

Мөн Аялал жуулчлалын мэргэжлийн холбооны зүгээс дэвшүүлж буй аялал жуулчлалын бодлого, зорилтыг хэрэгжүүлэхэд зам, тээврийн салбарын зүгээс шаардлагатай арга хэмжээг тодорхойлж, тэдгээрийг шийдвэрлэж, хамтран ажиллахаа илэрхийлсэн юм.

Хэлэлцүүлгийн үеэр оролцогч байгууллагууд агаарын тээвэр, төмөр замын тээвэр, авто замын тээврийн 2023, 2024 оны тээвэрлэлтийн мэдээллийг танилцуулж,  өнөөдрийн түвшнээ үнэлж дүгнэн, цаашид хийж хэрэгжүүлэх ажлуудаа хэлэлцэх,  тулгамдаж буй асуудлуудыг хэрхэн шийдвэрлэх талаар санал солилцлоо.

Цар тахлын дараах жилүүдэд улс орон бүр аялал жуулчлалын салбараа сэргээх, идэвхжүүлэхэд ихээхэн анхаарч буй. Тэр утгаараа олон улсын зах зээлд Монгол Улсын өрсөлдөх чадварыг нэмэгдүүлэх, тогтвортой аялал жуулчлалыг хөгжүүлэх, төрөөс хэрэгжүүлж буй бодлогыг таниулах чиглэлд зам, тээврийн салбарын аюулгүй, найдвартай үйлчилгээ хамгийн чухал нөлөөтэй.

Учир нь дэлхий дахинд аялагчид аялалдаа мөнгө зарахаас гадна тав тухтай үйлчилгээг худалдан авах сонирхолтой болсон. Иймд агаарын тээвэр, авто зам, төмөр замын үйлчилгээнд жуулчдад зориулсан шинэ маршрут, шинэ бүтээгдэхүүн үйлчилгээг бойжуулах, үйлчилгээгээ улам сайжруулах чиглэлд хамтран ажиллах хэрэгтэй байгааг оролцогчдын зүгээс онцолж байсан юм.  

Хэлэлцүүлгийн үр дүнд оролцогч байгууллагууд дараах ажлуудыг хамтран шийдвэрлэхээр харилцан ярьж тохиролцлоо. Тухайлбал, иргэний нисэхийн дэд бүтцийг хөгжүүлэх замаар орон нутгийн нислэгийг нэмэгдүүлэх, нэг зорчигчид оногдох тийзийн үнийг бууруулах ажлыг төр хувийн хэвшлийн түншлэлийн хүрээнд хэрэгжүүлэх тухай ярилцлаа.

Мөн Аялал жуулчлалын мэргэжлийн холбооны зүгээс Монгол орны байгаль цаг уур, улирлын онцлогоос шалтгаалан зуны улиралд жуулчдын тоо өсдөг, аялал жуулчлалын салбарын идэвх сэргэдэг. Энэ үетэй уялдуулан агаарын тээврийн нислэгийн хуваарийг аялал жуулчлалын салбартай харилцан хамааралтай тогтоож өгөх, тийзийн үнэ болон цагийн хуваарийг урьдчилан мэдэгдэх, өөрчлөлт оруулахгүй байх  зэрэг саналуудыг хэлж байв.  

Мөн нийслэл хот, аймаг, орон нутагт зохион байгууллагддаг олон улсын үзэсгэлэн яармаг, жуулчдад зориулсан томоохон эвентийг угтаад агаарын тээврийн үйлчилгээнд зарим өөрчлөлтүүдийг оруулах шаардлагатай байдаг. Жишээ нь,  улирлын шинж чанартай зохион байгуулагддаг зарим арга хэмжээ, мөсний баяр, тэмээний баяр, үндэсний их баяр наадам, аймгуудын жуулчдад зориулсан томоохон эвентийг угтаад дотоодын нислэгийн эргэлтийг зарим аймагт нэмэгдүүлэх хэрэгцээ гардаг.

Мөн зарим тохиолдолд цаг агаарын нөхцөл байдлаас шалтгаалан нислэг хойшлох, саатах, цагийн хуваарьт өөрчлөлт орох зэрэгт зорчигч үйлчлүүлэгч, жуулчдын тав тухыг хэрхэн хангах вэ зэрэг асуудлыг тээврийн салбарын үйлчилгээний байгууллагуудтай ярилцах зөвшилцөх, уян хатан шийдвэрлэх шаардлага тулгардаг.

Гадаадын жуулчдын хувьд, зарим тохиолдолд олон улсын нислэгийн билет захиалга дээр жуулчдын нэр солих хүсэлт цөөнгүй ирдэг. Энэ тохиолдолд тээврийн салбарын үйлчилгээний байгууллагууд дотоод журмаараа  уян хатан зохицуулж өгөх зэрэг харилцан уялдаатай хамтран ажиллах саналыг хэлж байлаа.  

Авто тээврийн үйлчилгээнд хил орчмын аялал жуулчлалыг хөгжүүлэхэд тулгамдаж буй асуудлын нэг нь  гадаадын жуулчдыг зөвшөөрөлгүй, найдваргүй тээврийн хэрэгслээр хувь хүмүүс, ААН тээвэрлэх асуудал нэмэгдсээр байгааг Зам тээврийн яамны Авто тээврийн бодлого зохицуулалтын газрын дарга Э.Мөнхнасан хэлж байсан юм. Тиймээс цаашид энэ зөвшөөрлийг Аялал жуулчлалын холбооноос бус Авто тээврийн үндэсний төвөөс авч байх, авто тээврийн үйлчилгээнд тавигдах шаардлагыг олон улсын стандартад нийцүүлэх, аюулгүй ажиллагааг сайжруулах чиглэлд холбогдох газрууд онцгой анхаарал хандуулан ажиллах шаардлагатай байгааг онцолж байв.

Хэлэлцүүлгийн төгсгөлд оролцогч байгууллагууд цаашид өөрсдийн хариуцсан чиглэл тус бүрээр Аялал жуулчлалын мэргэжлийн холбоотой хамтран ажиллаж, ажил мэргэжлийн онцлогт тохирсон  үйлчилгээ, маркетингийн сургалт авах, аялал жуулчлалын салбарыг хөгжүүлэх, тээврийн үйлчилгээг сайжруулах чиглэлд  хэрэгцээтэй мэдээллийг шуурхай солилцож, хамтран ажиллахаар тохиролцов.