Салбарын хяналт-шинжилгээ, үнэлгээ, дотоод аудитын газар нь үйл ажиллагааны стратегийн 7 дугаар зорилтын хүрээнд зам, тээврийн салбарын хууль тогтоомж, бодлого, хөтөлбөр, төслийн хэрэгжилт, яам, харьяа байгууллагын үйл ажиллагаанд хяналт-шинжилгээ, үнэлгээ, дотоод аудит, санхүүгийн хяналт, шалгалт хийх, зам, тээврийн салбарын хууль тогтоомж, дүрэм журам, техникийн зохицуулалт, стандарт, норм, нормативын хэрэгжилтэд хяналт шалгалт хийх, эрсдэлд суурилсан хяналт шалгалтыг төлөвлөх, хэрэгжүүлэх, тайлагнах үйл ажиллагааг нэгдсэн удирдлага, арга зүй, зохион байгуулалтаар хангах, зам, тээврийн салбарын техник, технологийн аюулгүй ажиллагаа, ослоос урьдчилан сэргийлэх үйл ажиллагааг удирдлага, зохицуулалтаар хангах, хэрэгжилтэд хяналт тавих, барилга байгууламжийг хууль тогтоомжийн дагуу эхлүүлэх, үргэлжлүүлэх, ашиглалтад хүлээн авах, үйл ажиллагааны үндсэн шаардлагыг хангуулах, үндсэн чиг үүргийг хэрэгжүүлнэ.

     Энэ хүрээнд хууль тогтоомж, Засгийн газрын шийдвэр, үүрэг даалгавар, хөгжлийн бодлогын баримт бичиг, хөтөлбөр, төсөл, олон улсын гэрээ, хэлэлцээр, Засгийн газрын үйл ажиллагааны хөтөлбөр, сайдын эрхлэх ажлын хүрээнд тусгагдсан төсөл, арга хэмжээний хэрэгжилтийн явцад хяналт-шинжилгээ хийж, үр дүнд нь үнэлгээ өгөх, санал боловсруулж, дүгнэлт, зөвлөмж гаргаж, гүйцэтгэлийн удирдлагыг хэрэгжүүлэх нөхцөлийг бүрдүүлэх, яам, харьяа агентлаг, байгууллагын үйл ажиллагаанд эрсдэлд суурилсан дотоод аудит хийж, санал боловсруулах, зөвлөмж, дүгнэлт гаргах, санхүү, төсвийн хууль тогтоомжийн хэрэгжилтэд  хяналт тавих, төсвийн хөрөнгө, өр, төлбөр, орлого, зарлага, хөтөлбөр, арга хэмжээ, хөрөнгө оруулалтад санхүүгийн хяналт, шалгалт хийж, үнэлэлт, дүгнэлт өгөх, зөвлөмж гаргах, хариуцлагын тогтолцоог сайжруулах, эрсдэлийн удирдлагаар хангах, мэргэжил, арга зүйн зөвлөгөө үзүүлэх, хэрэглэгчдийг мэдээллээр хангах  чиг үүргийг хэрэгжүүлнэ.

     Мөн энэ нэгж нь хяналт шалгалтын эрх зүйн орчныг боловсронгуй болгох, хяналт шалгалтын бүртгэл, мэдээллийн санг хөтлөх, хяналт шалгалтын үйл ажиллагаанд шинжлэх ухаан, технологийн ололт, олон улсын дэвшилтэт арга, аргачлалыг нэвтрүүлэх, аймаг, нийслэл дэх хяналтын нэгж, улсын байцаагчдыг шуурхай удирдлага, зохион байгуулалтаар хангах, улсын байцаагчийн эрх олгох, цуцлах, салбарын хөдөлмөрийн аюулгүй байдлыг хангах, аж ахуйн нэгж, байгууллага, иргэдийг холбогдох мэдээ, мэдээллээр хангах, хамтран ажиллах чиг үүргийг хэрэгжүүлнэ.

     Энэ нь салбарын хууль тогтоомж, бодлого, хөтөлбөр, төсөл, төлөвлөгөөний хэрэгжилт, биелэлтийг үнэлэх, дүн шинжилгээ хийх, мэдээллийг нэгтгэх, харьцуулан судлах, гарч байгаа хүндрэл, бэрхшээлийг шийдвэрлэх арга замыг тодорхойлох, эрсдэлийн удирдлагаар хангаж үнэн зөв, бодит мэдээллээр удирдлага, яамны аппарат, хэрэглэгч, иргэдийг хангах замаар хэрэгжинэ.

     Нэгжийн үйл ажиллагаа нь авто зам, автотээвэр, иргэний нисэхийн барилга байгууламжийн зураг, төсөв, барилга угсралт, засвар арчлалтын чанар, ашиглалт, усан зам, автотээврийн хэрэгслийн ашиглалт, техникийн бүрэн бүтэн байдал, найдвартай ажиллагаа, тээвэрлэлтийн аюулгүй байдлыг хангуулах, эрсдэл, ослоос урьдчилан сэргийлэх, хүний амь нас, эрүүл мэнд, хүрээлэн буй орчныг хамгаалахад чиглэнэ.

     Мөн Зам, тээврийн сайдыг салбарын бодлогыг хэрэгжүүлэхтэй холбоотой шийдвэр гаргахад шаардлагатай шуурхай зөвлөгөө, бүх талын дэмжлэгээр хангах, зам, тээврийн салбарын хяналтын бодлогыг хэрэгжүүлэхэд мэргэжлийн зөвлөгөө, дэмжлэг үзүүлэн ажлын уялдаа холбоог хангах, салбарын техник, технологийг шинэчлэх, шинжлэх ухаан, эрдэм шинжилгээний төсөл хэрэгжүүлэхэд хамтран ажиллах, олон улсын гэрээ, хэлэлцээрийн хэрэгжилтийг хангах, яамны удирдлага, албан хаагчдыг мэргэжил, арга зүй, эрсдэлийн удирдлага, зөвлөгөө, мэдээллээр хангах, хууль тогтоомж, шийдвэрийн хэрэгжилтийг тайлагнах замаар хэрэгжинэ.

     Энэ нэгжээс үзүүлэх үйлчилгээний үндсэн хэрэглэгч нь сайд, яамны Төрийн нарийн бичгийн дарга, Сайдын эрхлэх ажлын хүрээний Засгийн газрын агентлаг, байгууллага, аж ахуйн нэгж, төрийн бус байгууллага, иргэн байх бөгөөд шууд бус хэрэглэгч нь бусад яам, Засгийн газрын агентлаг, нутгийн захиргааны байгууллага байна.

     Энэ үйлчилгээг үзүүлэхэд хамтран ажиллах байгууллага нь нутгийн захиргааны байгууллага, хяналтын бусад байгууллага, сайдын эрхлэх асуудлын хүрээний байгууллагууд, холбогдох бусад яам газрууд, иргэн, эрдэм шинжилгээ, судалгааны байгууллага байна.