“Монголын түлш тээвэрлэгчдийн өлзийт зам холбоо” ТББ-ын төлөөллийг Зам, тээврийн яамны Төрийн нарийн бичгийн дарга С.Батболд, салбарын хяналтын газрын дарга М.Энхболд, Зам тээврийн хөгжлийн төв ТӨҮГ-ын захирал Д.Оюунболд тэргүүтэй мэргэжилтнүүд хүлээн авч уулзлаа.

Урин дулааны улирал эхэлж, цаг агаар дулаарч газрын хөрс, замын далангийн өнгөн хэсэг гэсэж буйтай холбоотойгоор авто замд ус чийг ихээр хуримтлагдаж, ачаа даах чадвар, бат бэхийн үзүүлэлт их хэмжээгээр буурдаг. Энэ үед даац хэтрүүлэн тээвэр хийснээр зорчих хэсгийн хучилтад нүхэн эвдрэл, торон хагарлууд их хэмжээгээр нэмэгддэг. Эвдрэл гэмтлээс үүдэж, иргэд аюулгүй, ая тухтай зорчих боломжгүй болж, осол гарах, тээврийн хэрэгслийн техникийн бүрэн бүтэн байдал алдагдах, эвдрэх аюултай. Ер нь авто замын эвдрэл, гэмтэлд даац хэтрэлт хамгийн их нөлөөлдөг. Жишээлбэл, 2024 онд гэхэд зам тээврийн ослын улмаас 500 орчим хүний амь нас хохирсон байна.

Уулзалтын үеэр тээвэрчдийн зүгээр Монгол Улсын автозамын даацын хяналтыг зохицуулдаг стандартыг өөрчлөхийг хүссэн албан шаардлага хүргүүллээ. Тодруулбал, “Тээврийн хэрэгслийн нэг тэнхлэг дээрх ноогдох жин стандартад зааснаар 11.5 тонн хэмжээндээ байж, зургаан тэнхлэгт тээврийн хэрэгсэл нь 66 тонн байгаа. Гэтэл стандартын бүх жинг хэтрүүлсэн хэмээн үзэж зогсоох болсон тул энэ асуудлыг шийдвэрлэж өгнө үү” гэсэн юм.

Харин Төрийн нарийн бичгийн дарга С.Батболд хэлэхдээ “Манай улсад автозамын даацын хяналтыг MNS 4598:2025 буюу “Автотээврийн хэрэгслийн техникийн байдалд тавих ерөнхий шаардлага”-аар зохицуулдаг. Үүнд нэг тэнхлэг дээрх жин 11 тонн, нийт жин 44 тонноор тодорхойлсон байдаг. Энэхүү стандарт нь зөвхөн манай улсын стандарт бус олон улсад ч дагаж мөрддөг стандарт юм. Тодруулбал, БНХАУ-д нийт жин нь 49 тонн, ОХУ-д 44 тонн, Европын холбооны улсууд 44 тонн гэсэн стандартыг тус тус мөрдөж ажиллаж байна” гэдгийг онцолсон юм.

Мөн “Автотээврийн хэрэгслийн тэнхлэгийн тоог хамгийн их ачааллаар үржүүлж, дээр нь тээврийн хэрэгслийн бодит жинг нэмж тооцож байгаа нь буруу бөгөөд тэнхлэгийн тоо, тэдгээрийн хоорондын зай, нэг тэнхлэгт байрлах дугуйн тоо зэргээс хамааран хөтлөгч болон хөтлөгдөх тэнхлэг дээрх ачаалал нь тэнхлэг болон бүлэг тэнхлэгүүдэд хуваарилагдан, нийлбэр нь бүх жингийн хэмжээнээс хэтрэхгүй байх ёстой. Мөн Стандартчилал, техникийн зохицуулалт, тохирлын үнэлгээний итгэмжлэлийн тухай хуулийн 9 дүгээр зүйлийн 9-т “Үндэсний стандартын үзүүлэлт шаардлага нь олон улс, бүс нутгийн стандартын шаардлагад нийцсэн байна” гэж заасан бөгөөд Монгол Улс Замын хөдөлгөөний Венийн конвенцид нэгдэн орсон улсын хувьд болон Автотээврийн харилцааны талаарх олон улсын харилцаа өргөжин тэлж байгаатай холбоотойгоор эрх зүйн актуудаа олон улсын жишигт нийцүүлэх ажлууд хийгддэг.

Иймээс Авто замын тухай хуулийн 29 дүгээр зүйлийн 29.3.5-т “тусгай хамгаалалтгүй, эсвэл зөвшөөрөлгүйгээр гинжит болон тухайн авто замын үзүүлэлтээс хэтэрсэн овор, хэмжээ, даацтай тээврийн хэрэгсэл зорчуулах”-ыг хориглосон байх тул хуулийн заалтыг мөрдөж ажиллах нь зүйтэй” гэсэн байр сууриа илэрхийллээ.