Монгол Улсын урт хугацааны хөгжлийн бодлого “Алсын хараа-2050”, Монгол Улсын Засгийн газрын 2024-2028 оны үйл ажиллагааны хөтөлбөр болон Засгийн газрын 2025 оны 21 ба 86 дугаар тогтоолын дагуу баригдах Багахангай-Хөшигийн хөндий чиглэлийн салбар төмөр замын төслийн нээлтийн ажиллагаа өнөөдөр (2025.04.25) Хөшигийн хөндийд ёслол төгөлдөр боллоо.

Нээлтийн үйл ажиллагаанд  Монгол Улсын Ерөнхий сайд Л.Оюун-Эрдэнэ, Монгол Улсын Засгийн газрын гишүүн, Зам, тээврийн сайд Б.Дэлгэрсайхан, нийслэлийн Засаг дарга бөгөөд Улаанбаатар хотын Захирагч Х.Нямбаатар болон холбогдох албаныхан оролцож үг хэллээ.

Энэхүү Багахангай-Хөшигийн хөндий чиглэлийн салбар төмөр зам нь “Улаанбаатар төмөр зам” ХНН-ийн Багахангай өртөөнөөс салаалж, Төв аймгийн Сэргэлэн сумын нутгаар дайрч, Хөшигийн хөндий хүртэл чиглэж байгаа III зэрэглэлийн салбар төмөр зам юм. Нийт 102,5 километр урттай,  1520 мм царигтай, 3 өртөө, 4 зөрлөгтэй, 2,5 километр урт гүүрэн байгууламжтай байхаар төлөвлөгдөж байна.

Төслийн үйл ажиллагаатай холбогдуулан Монгол Улсын Ерөнхий сайд Л.Оюун-Эрдэнэ, Зам, тээврийн сайд Б.Дэлгэрсайхан болон холбогдох албаны хүмүүс өглөө эрт Багахангай өртөөний трансын эхлэл хэсэг болон бүтээн байгуулалтын ажил үргэлжлэх гол цэгүүдийн үйл ажиллагаатай танилцаж мэдээлэл солилцсон юм. 

"Энэхүү салбар төмөр замын бүтээн байгуулалт нь улс орны нийгэм, эдийн засгийн хөгжлийн эрчмийг нэмэгдүүлэх, нийслэлийн төвлөрлийг сааруулах чиглэлээр төлөвлөж буй Төв аймгийн Сэргэлэн сумын Хөшигийн хөндийд баригдах Тээвэр логистикийн төв төсөл, Хүннү хот, Зуунмод хот, Майдар хот, Сэргэлэн сумын төв дагуул хотуудыг барьж байгуулах суурь нөхцөл тээврийн дэд бүтэц, логистикийн асуудлыг шийдвэрлэнэ. Төсөл хэрэгжсэнээр жилд өссөн дүнгээр 3.5 - 20 сая тонн ачааг Улаанбаатар хотод оруулахгүй шинээр баригдах Тээвэр логистикийн төв рүү тээвэрлэхээр төлөвлөж байгаа" гэдгийг  Зам, тээврийн сайд Б.Дэлгэрсайхан танилцууллаа. 

Монгол Улсын Ерөнхий сайд Л.Оюун-Эрдэнэ нээлтийн үйл ажиллагаанд хэлсэн үгэндээ "Хаврын бүтээн байгуулалтууд төлөвлөгөөний дагуу идэвхжиж, Засгийн газар болон нийслэлээс хэрэгжүүлэх томоохон төсөл, бүтээн байгуулалтууд үе шаттай эхэлж байгаагийн нэг нь энэхүү түүхэн бүтээн байгуулалт юм" гэдгийг онцлон тэмдэглэлээ.

Мөн нийслэл Улаанбаатар хот, шинэ нисэх буудлыг түшиглэсэн Хүннү хотыг шинээр байгуулах эхлэл болж буйгаараа уг төсөл онцгой ач холбогдолтой төдийгүй орчин үеийн логистикийн 5PL стандартад нийцсэн ачаа, тээврийн үйлчилгээг нэвтрүүлж, Улаанбаатар хотын ачаа тээврийн үндсэн зангилааг Богд уулын урд хэсгээр тойруулах үндсэн шийдлийн нэг болж байгааг онцлон тэмдэглээд бүтээн байгуулалтын ажилд гар бие оролцох инженер техникийн ажилтнуудад амжилт хүслээ. 

Багахангай-Хөшигийн хөндий чиглэлийн төмөр замыг холбогдох хууль тогтоомж, олон улсын стандарт, чанарын шаардлагад нийцүүлэн барьж байгуулах, ашиглалтыг “Монголын төмөр зам” ТӨХК хариуцан ажиллах юм. Энэхүү бүтээн байгуулалтын ажилд дотоодын 110 орчим ААН-ийн 2500 гаруй инженер техникийн ажилтнуудыг татан оролцуулж, тэдний ур чадвар туршлагыг түшиглэн төр, хувийн хэвшлийн хамтын ажиллагааны үндсэн дээр барьж байгуулах юм.  

Энэхүү төслийг хэрэгжүүлснээр: 

 Төмөр замын бүтээн байгуулалтын хугацаанд 3000 орчим түр ажлын байр шинээр бий болох ба төслийг хэрэгжүүлснээр 420 хүн шинээр байнгын ажлын байраар хангагдана.

  Төсөл хөрөнгө оруулалтаа 15 жилийн хугацаанд нөхөх бөгөөд Монгол Улсад нийт 294.8 тэрбум төгрөгийн татвар төлнө. 

 Төсөл хэрэгжсэнээр жилд өссөн дүнгээр 3.5 - 20 сая тонн ачааг Улаанбаатар хотод оруулахгүй шинээр баригдах Тээвэр логистикийн төв рүү тээвэрлэхээр төлөвлөж байна.

Ингэснээр Нийслэлд төмөр зам, автозам огтлолцдог гармууд дээр галт тэрэгний хөдөлгөөнд зориулж хоногт дунджаар 144 минут авто замын хөдөлгөөн хаадаг хугацааг 21- 120 минутаар багасгах боломж бүрдэж автозамын түгжрэлийг бууруулахад зохих хувь нэмэр оруулах юм.