ЗАМ, ТЭЭВРИЙН САЛБАРЫН 2020 ОНЫ СТАТИСТИК МЭДЭЭЛЭЛ

(урьдчилсан гүйцэтгэлээр)

Монгол Улсын хэмжээнд бүх төрлийн тээврээр 2020 онд нийт 60,3 сая тонн ачаа тээвэрлэсэн нь өмнөх оноос 12,6 хувиар буурсан байна.  Үүнээс төмөр замаар 30 сая тн, автотээврээр 30,5 сая тонн, агаарын тээврээр 2,53 мянган тонн ачаа тус тус тээвэрлэсэн байна. Өмнөх оны ачаа тээвэрлэлттэй харьцуулахад төмөр зам 6 хувиар өсч, автотээвэр 25 хувиар, агаарын тээвэр 56 хувиар буурсан байна.

Нийт ачаа эргэлт 23860,5 сая тонн км болж өмнөх оноос 1 хувиар өссөн байна. Төмөр замын ачаа эргэлт 19167,6 сая тонн км болж өмнөх оноос 10,3 хувиар өссөн бол автотээврийн ачаа эргэлт 4685,3 сая тонн км болж өмнөх оноос 24,5 хувиар, агаарын тээврийн ачаа эргэлт 7,7 сая тонн км болж өмнөх оноос 44,6 хувиар буурсан.

Бүх төрлийн тээврээр 2020 онд нийт 126,5 сая хүн тээвэрлэснээс төмөр замаар 1,97 сая хүн, автотээврээр 124,1 сая хүн, агаарын тээврээр 450 мянган хүн тээвэрлэсэн байна. Нийт зорчигч тээвэрлэлтийг өмнөх онтой харьцуулахад 26,8 хувиар буурсан бөгөөд үүнээс төмөр зам 33,2 хувиар, автотээвэр 26,3 хувиар, агаарын тээвэр 72,2 хувиар тус тус буурсан байна. Усан замын тээврээр 2020 онд 31158 зорчигч тээвэрлэж өмнөх оноос 204 зорчигчоор өссөн байна. Нийт зорчигчдын 31037 дотоодын иргэд бол 121 гадаадын иргэд байна.

Нийт зорчигч эргэлт 3406,2 сая хүн км бөгөөд үүнээс төмөр замаар 579,3 сая хүн км, автотээврээр 2178 сая хүн км, агаарын тээврээр 648,9 сая хүн км, усан замын тээврээр 0,4 сая хүн км зорчигч эргэлт хийсэн байна. Өмнөх онтой харьцуулахад нийт зорчигч эргэлт 52 хувиар, үүнээс төмөр зам 47,8 хувиар, автотэээвэр 25,5 хувиар,агаарын тээврийн зорчигч эргэлт 79,1 хувиар, усан замын тээвэр 33 хувиар тус тус буурсан үзүүлэлттэй байна.

Тээврийн салбарын нийт орлого 1474 тэрбум төгрөг болж өмнөх оноос 26,4 хувиар буурсан. Төмөр замын орлого 770,06 тэрбум төгрөг болж өмнөх оноос 8,7 хувиар өссөн бол, автотээвэр 564,38 тэрбум төгрөг болж өмнөх оноос 29,1 хувиар, агаарын тээвэр 139,66 тэрбум төгрөг болж өмнөх оноос 72 хувиар буурсан байна. Харин усан замын тээврийн орлого 495 сая төгрөг болж өмнөх оныхоос 31 хувиар өссөн үзүүлэлттэй байна.

СТАТИСТИК ҮНДСЭН ҮЗҮҮЛЭЛТ

Covid-19 цар тахлын улмаас Монгол Улсын хэмжээнд 2020 онд нийт ачаа тээвэрлэлт болон зорчигч тээвэрлэлт буурсан. Нийт ачаа тээвэрлэлт өмнөх оноос 12,6 хувиар, зорчигч тээвэрлэлт 26,8 хувиар буурсан боловч төмөр замын ачаа тээвэрлэлт 6 хувиар өссөн үзүүлэлттэй байна. Гамшгийн үед төмөр замын салбар үйл ажиллагаагаа тасалдуулахгүй тогтмол шуурхай арга хэмжээ авч ажилласнаар ачаа тээвэрлэлтийн хэмжээг өсгөж чадсан байна.

2020 ОНД БҮРТГЭЛТЭЙ ТЭЭВРИЙН ХЭРЭГСЭЛ

Монгол Улсын хэмжээнд 2020 оны бүртгэлтэй тээврийн хэрэгсэл 1136734 болж өмнөх оноос 93706 тээврийн хэрэгслээр буюу 9 хувиар өссөн байна. Үүнээс 715309 суудлын автомашин 63%-ийг, 211083 ачааны автомашин 18,5%-ийг, 36084 автобус 3,2%-ийг, 13535  тусгай зориулалтын 1,2%-ийг, 67781 мотоцикл 6%-ийг, 40616 чиргүүл 3,6%-ийг, 30185 зүтгүүр 2,7%-ийг, 15004 механизм 1,3%-ийг, 7137 цистерн 0,5%-ийг тус тус эзэлж байна.