Тавантолгойн бүлэг ордоос төмөр замын тээврээр ачигдсан чингэлэгтэй ачааг вагоноос автомашинд, вагоноос вагонд шилжүүлэн ачих, хадгалах, гаалийн бүрдүүлэлт, төлбөр тооцоо хийх зэрэг нэг цэгийн үйлчилгээ бүхий 24 цагийн тасралтгүй үйл ажиллагаатай Гашуунсухайт шилжүүлэн ачих терминалын барилга угсралтын ажил 76 орчим хувийн гүйцэтгэлтэй байна. Газар шороо, дөрвөлжин, дугуй хоолой, дээд бүтцийн ажлууд бүрэн хийгдэж дууссан.

 

Тус байгууламж нь жилд 18 сая.тн ачааг шилжүүлэн ачих хүчин чадалтай, ачилт, буулгалтын 74га талбайтай. Одоогоор бетон талбайн барилга угсралтын ажил 60 орчим хувийн гүйцэтгэлтэй байгаа ба нэг удаад 2100 чингэлэгтэй ачааг буулгах хүчин чадалтай, нийт 985м урт, 64м өргөн, 0,3м өндөртэй байхаар төлөвлөгдсөн тус талбайг энэ сарын 20-ны өдөр бүрэн ашиглалтад оруулахаар ажиллаж байна.

 

Шилжүүлэн ачих терминал төслийн хүрээнд удирдлагын байр, нэг цэгийн үйлчилгээний байр, харуулын байр, авто засварын төв, амрах байр зэрэг нийт 9 барилга баригдаж байгаа ба тус төсөл бүрэн ашиглалтад орсноор 285 байнгын ажлын байр шинээр бий болно.