Төрийн хяналт шалгалтын тухай хуулийн 5.1 дэх заалтад “Хяналт шалгалтыг төрийн захиргааны төв болон төрийн захиргааны байгууллага, орон нутагт хяналт шалгалт хэрэгжүүлэх эрх бүхий байгууллага /цаашид “хяналт шалгалтын байгууллага” гэх/ хуульд заасан үндэслэл, журмын дагуу хийх бөгөөд төлөвлөгөөт, төлөвлөгөөт бус, урьдчилан сэргийлэх, гүйцэтгэлийн гэж ангилна” гэж заасан байдаг.

Зам, тээврийн хөгжлийн яамны Салбарын хяналтын газраас АВТО ЗАМЫН ХЯНАЛТЫН ЧИГЛЭЛЭЭР 2023 онд төлөвлөгөөт 197, төлөвлөгөөт бус 26, гүйцэтгэлийн 18 хяналт шалгалт хийж, улсын ахлах байцаагчийн 157 албан шаардлага, 1 акт,  22 дүгнэлт, 11 зөвлөмжийг хүргүүлсэн бөгөөд холбогдох хууль тогтоомжийн хүрээнд хийсэн хяналт шалгалтаар 40 ААНБ-д нийт 73 сая төгрөгийн торгууль оногдуулж, 100% барагдуулсан байна.

Засгийн газрын 2020 оны 479 дүгээр тогтоолын нэгдүгээр хавсралтаар батлагдсан “Хяналт шалгалт хийх нийтлэг журмын 16.1 дэх заалт “Хяналтын хуудсыг тухайн асуудлыг эрхэлсэн хяналт шалгалтын байгууллага батална” заалтуудыг үндэслэн Зам, тээврийн хөгжлийн яамны Төрийн нарийн бичгийн даргын 2024 оны 02 дугаар сарын 06-ны өдрийн А/19 дугаартай тушаалаар Зам, тээврийн салбарын авто замын чиглэлээр хяналт шалгалтын үйл ажиллагаанд хэрэглэх  “Хяналтын хуудас”-ыг баталсан.

Төрийн хяналт шалгалтын тухай хуулийн 5.7-д “Хяналт шалгалтыг зөвхөн удирдамж, хяналтын хуудсанд заасан асуудлын хүрээнд хийж гүйцэтгэнэ” гэж заасан байдаг. Иийд зам, гүүрийн барилга, засварын ажлын гүйцэтгэгч, зөвлөх, зураг төсөл зохиогч байгууллагууд дээрх “Хяналтын хуудас”-ны асуумжийн дагуу баримт бичгийн бүрдлийг хангаж ажиллахыг зөвлөж байна.