Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр буюу 2024 оны 09 сарын 30-ны өдөр  Бүгд Найрамдах Социалист Вьетнам Улсын Тээврийн сайд Нгуен Ван Танг болон холбогдох албаны төлөөлөгчидтэй уулзлаа.

Уулзалтын эхэнд Зам, тээврийн сайд Б.Дэлгэрсайхан “Бүгд Найрамдах Социалист Вьетнам Улсын Тээврийн сайд ноён Нгуен Ван Танг-тай өнгөрсөн долоо хоногт БНХАУ-д зохион байгуулагдсан Тогтвортой тээврийн уулзалтад оролцох  үеэрээ уулзаж байсан. Харин одоо таныг Монгол Улсад айлчлан ирж, хоёр улсын тээврийн салбарын харилцааг өргөжүүлэхэд чухал үүрэг гүйцэтгэх, Харилцан ойлголцлын санамж бичигт гарын үсэг зурсанд талархаж байна.          Цаашид манай хоёр улсын тээврийн салбарын хамтын ажиллагаа илүү өргөн хүрээтэй хамтран ажиллана гэдэгт итгэлтэй байна” гэлээ.

Мөн хоёр улсын худалдаа, эдийн засгийн харилцааг хөгжүүлэхэд газар зүйн хувьд алслагдмал байдал болон зам тээвэр, логистикийн холболт сул байгаа нь саад бэрхшээл учруулж байна. Тиймээс агаарын тээвэр, төмөр зам, авто замын тээврийн холбоосуудыг нэмэгдүүлэх чиглэлд анхаарч хамтран ажиллах шаардлагатай байгааг уламжиллаа. Мөн хоёр талын төмөр замын тээврийн хамтын ажиллагааг эрчимжүүлэх ажлын хүрээнд Монгол, Вьетнамын төмөр замын байгууллагуудын хамтарсан уулзалтыг 2024 оны сүүлийн хагас жилд зохион байгуулах саналыг тавьсан юм.

Талууд уулзалтаар хоёр улсын хооронд аялал жуулчлал, худалдаа, эдийн засгийн ажиллагаа эрчимжиж байгаатай холбогдуулан Вьетнам улсын агаарын тээвэрлэгчийг хуваарьт нислэг нээх тухай,  хуурай боомтын талаар харилцан туршлага хуваалцах, хөрөнгө оруулах чиглэлд хамтран ажиллах боломжуудын талаар санал солилцлоо.

Бүгд Найрамдах Социалист Вьетнам Улсын Тээврийн сайд Нгуен Ван “Манай хоёр улсын харилцаа, хамтын ажиллагаа өргөжин хөгжиж буй чухал үедээ явж байна. Хоёр улсын тээврийн салбарын хамтын ажиллагаа илүү өрнөлт сайтай байгаа ч цаашид илүү өргөн хүрээтэй хамтран ажиллана гэж бодож байна. Эрхэм сайд Б.Дэлгэрсайхан таны тавьсан тээврийн салбарын хамтын ажиллагааг эрчимжүүлэх хамтарсан уулзалтыг бид бүрэн дэмжиж байна. Агаарын тээврийг хөгжүүлэх чиглэлд хоёр улсын хооронд шууд нислэг хийх саналыг бид холбогдох газруудаас авсан. Энэ зөвшөөрлийг удахгүй олгох болно. Шууд нислэгийн үр дүнд улс орон, иргэд хоорондын найрамдалт харилцааг сайжруулах,  аялал жуулчлал хөгжих олон талын ач холбогдолтой гэж харж байна.  Манай улсын Тээврийн яамны зүгээс боловсон хүчин бэлтгэх, далайчдыг сургах, хуурай боомтын чиглэлээр туршлага солилцон хамтран ажиллах боломжтой” гэв.