Салбарын улсын ерөнхий байцаагчийн баталсан 04/02, 04/19 дүгээр удирдамжийн дагуу Архангай, Баян-Өлгий, Дорнод, Увс, Ховд, Хөвсгөл, Сэлэнгэ аймагт усан замын тээврийн ажил, үйлчилгээ эрхлэгч 14 аж ахуйн нэгж, байгууллага, 40 иргэдийн тээвэрлэлтийн үйл ажиллагаа болон нийт 72 усан замын тээврийн хэрэгслийн техникийн бүрэн бүтэн байдалд  2024 оны 06 дугаар сарын 18-ны өдрөөс 08 дугаар сарын 05-ны өдрүүдэд хяналт шалгалтыг хийж гүйцэтгэлээ.  

Шалгалтаар усан замын тээврийн үйлчилгээг тусгай зөвшөөрөлгүйгээр эрхэлсэн, тээвэрлэлтийн гэрээ байгуулаагүй, техникийн хяналтын үзлэгт хамруулаагүй, усан замын тээврийн хэрэгслийн гэрчилгээ аваагүй, үйлдвэрлэгчээс тогтоосон хөдөлгүүрийн хүчин чадлыг нэмэгдүүлж өөрчилсөн, хөдөлгүүрийг сольсны дараа Бүртгэлийн газарт 14 хоногийн дотор мэдэгдэн бүртгүүлж шилжилт хөдөлгөөнийг хийлгээгүй, усан замын зогсоолыг холбогдох хууль тогтоомжийн дагуу барьж байгуулж тоноглоогүй, улсын дугаарыг тээврийн хэрэгслийн үзэгдэх орчны хэсэгт дэвсгэр өнгөнөөс ялгагдах тод өнгөөр тэмдэглээгүй, усан замын тээврийн хэрэгсэл дээр Монгол Улсын Төрийн далбааг мандуулаагүй зэрэг зөрчил дутагдал илэрч байна.

Мөн усан замын тээврийн хэрэгслийн жолооч болон усчин аврагчийн сургалтад хамрагдаагүй, зорчигчийн амь нас, эрүүл мэндийг хамгаалах талаар удирдамж, зааврыг боловсруулаагүй, аврах хантааз стандартын болон ашиглалтын шаардлага бүрэн хангаагүй, аврах хантаазны аюулгүй байдлыг эрэг дээр болон усны гадаргуу дээр туршиж баталгаажуулаагүй, бусад аврах хэрэгсэл болон гал унтраах хэрэгслээр бүрэн хангагдаагүй, гэрлэн ба дуут дохио хэвийн ажиллагаагүй, зорчигчдод тасалбар олгодоггүй, жолоочийн хариуцлагын болон бусдын амь насны даатгалыг хийлгээгүй, засвар үйлчилгээ хийсэн бүртгэлийг хувийн хэрэгт бүрэн хөтөлж хэвшээгүй, дотоод хяналт шалгалт зохион байгуулах журамд усан замын тээврийн ажил үйлчилгээг тусгаагүй зэрэг зөрчил, дутагдлууд илэрлээ.

Шалгалтын явцад усан замын тээврийн ажил, үйлчилгээ эрхлэгчдэд мэргэжил арга зүйн зөвлөгөө өгч, 346 дутагдлыг илрүүлэн 286 зөрчлийг арилгуулж,  улсын ахлах байцаагчийн 357 заалттай 47 албан шаардлагыг хүргүүлж, хоёр заалттай 1 улсын ахлах байцаагчийн дүгнэлт, усан замын тээврийн хэрэгслийн хөдөлгөөнийг түр хугацаагаар зогсоох тухай 12 заалт 6 улсын байцаагчийн актыг гаргаж хүргүүлж, биелэлтэд хяналт тавин ажиллав. 

Зөрчил дутагдал гаргасан 10 аж ахуйн нэгж, иргэнд 6.850.0 мянган төгрөгийн шийтгэлийн арга хэмжээ авч, 100 хувь барагдуулж, ажиллалаа.

Мөн шалгалтаар Хөвсгөл аймагт “Усан замын тээврийн тухай хуулийн хэрэгжилтийг хангах нь” сэдэвт үндэсний семинарт “Усан замын тээвэр дэх төрийн хяналт шалгалт, салбарын хууль, тогтоомжийн хэрэгжилт” сэдвээр илтгэл тавьсан ба уг сургалтад нийт 80 гаруй аж ахуйн нэгж, иргэн оролцлоо.

Уг сургалтад “Усан замын тээврийн тухай хуулийн хэрэгжилтийг хангах нь” сэдэвт үндэсний семинарт Зам, тээврийн хөгжлийн яам, Хөвсгөлийн Улсын тусгай хамгаалалттай газрын хамгаалалтын захиргаа, “Монголын завьчдын нэгдсэн холбоо” НҮТББ, “Монгол даатгал” ХХК болон усан замын тээврийн ажил, үйлчилгээ эрхлэгч аж ахуйн нэгж, иргэдийн төлөөлөл бүхий нийт 80 гаруй хүн оролцож, Х.Саранцэцэг-“Усан замын тээвэр дэх төрийн хяналт шалгалт, салбарын хууль, тогтоомжийн хэрэгжилт”, Д.Жавхлан-“ЗТХЯ-наас усан замын тээврийн талаар баримталж буй бодлого”, Т.Олонбаяр-“Усан замын тээврийн салбарт авч хэрэгжүүлж буй арга хэмжээ” сэдвээр илтгэл тавив.

Шалгалтад хамрагдсан усан замын тээврийн ажил, үйлчилгээ эрхлэгч аж ахуйн нэгж, байгууллага, иргэдийн тээвэрлэлтийн ажил үйлчилгээг Зам, тээврийн хөгжлийн яамны Төрийн нарийн бичгийн даргын 2022 оны А/19 дүгээр тушаалын 35 дугаар хавсралтаар баталсан №04.4.1 кодтой “Усан замын тээврийн аюулгүй байдлыг шалгах” хяналтын хуудсаар шалгахад их эрсдэлтэй-9, дунд эрсдэлтэй-5, бага эрсдэлтэй-21 үнэлэгдэж, хууль сахин мөрдөлтийн дундаж 72.2%, эрсдэл үүсэх магадлал 29.2 хувь буюу дундаж эрсдэлтэй үнэлэгдэж байна.

Шалгалтын дүнг үндэслэн Дорнод, Увс, Ховд аймгийн Засаг дарга болон Онцгой байдлын Ерөнхий газарт “Хууль тогтоомжийн хэрэгжилтийг хангуулах тухай” албан бичгийг тус тус хүргүүлж ажиллав.