Монгол Улсын Засгийн газрын гишүүн,  Зам тээврийн сайд Б.Дэлгэрсайхан энэ өдрүүдэд ОХУ-д албан томилолттой ажиллаж байна. Тэрээр  Москва хотноо жил бүр уламжлал болгон зохион байгуулагддаг “ТЭЭВРИЙН 7 ХОНОГ” олон улсын арга хэмжээнд  оролцож байна.  Энэхүү форумын уулзалт хэлэлцүүлэгт жил бүр гадны 4000 орчим зочид төлөөлөгч оролцдог бол үзэсгэлэнгийн арга хэмжээнд 10 мянга гаруй хүн оролцохоор бүртгүүлжээ.

"Оросын тээврийн форум" нь 2007 оноос хойш жил бүр  зохион байгуулагдаж байгаа бөгөөд олон улсын сайд дарга нар, салбарын удирдлагууд, бизнес эрхлэгчид, хөрөнгө оруулагчид, үйлдвэрлэгчид хоорондын харилцан ойлголцлыг бэхжүүлэх, тээврийн салбарт дэлхий дахинаа тулгамдаж буй сэдвүүд, хөгжлийн шийдлүүдийг хэлэлцдэг томоохон арга хэмжээ юм.

2024 оны форумын гол сэдэв нь “Үр ашигтай тээврийн систем”-ийн тухай хэлэлцэх юм. ОХУ-д өндөр хурдны хөдөлгөөнийг хөгжүүлэх, тээврийн үйлчилгээний хүртээмж, аюулгүй байдлыг нэмэгдүүлэх, түүнчлэн тээврийн салбарт технологийн шийдлүүдийг нэвтрүүлэх, үр ашигтай тээврийн системийг хөгжүүлэх, олон улсын хамтын ажиллагаа, хүний нөөцийг хөгжүүлэхэд бүс нутгуудын гүйцэтгэх үүргийг онцгойлон анхаарч байна.  Мөн тээвэр, дэд бүтэц, үйлчилгээ, үнэ, ложистик, үйлдвэрлэл, цахимжуулалт гэсэн тээврийн эдийн засгийг бүрдүүлдэг олон чухал асуудлыг  хэлэлцэхээр төлөвлөжээ.

2024 онд чуулга уулзалтыг дагалдан гарч буй үзэсгэлэнд тээвэр, дэд бүтцийн бүтээн байгуулалт, ложистикийн салбарын  томоохон ололт амжилт, дэвшилтэт технологи бүхий 100 гаруй компани оролцож байна. Үзэсгэлэнд ОХУ-ын бүс нутаг, аж үйлдвэрийн хэлтэс, тээврийн хэрэгсэл үйлдвэрлэгчид, ачаа болон зорчигч тээвэрлэгчид, тээврийн дэд бүтцийн эзэд, операторууд, засвар үйлчилгээ, логистикийн компаниудын төлөөлөл өргөн бүрэлдэхүүнтэй оролцож байна.