Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр Европын сэргээн босголт, хөгжлийн банкны Евразийн дэд бүтэц хариуцсан захирал Екатерина Мирошникийг хүлээн авч уулзлаа. Уулзалтад Евразийн дэд бүтцийн газрын захирал Екатерина Мирошник, ЕСБХБ-ны Суурин төлөөлөгч Ханнес Такач, Евразийн дэд бүтцийн газрын тэргүүн банкир Тимур Ермеков, Европ, Ойрхи Дорнод, Африкийн Дэд бүтцийн газрын захирал Сью Барретт болон холбогдох албаны төлөөлөгч нар оролцлоо.

Уулзалтын эхэнд сайд Б.Дэлгэрсайхан Европын сэргээн босголт, хөгжлийн банк Монгол Улсад 2006 онд үйл ажиллагаагаа эхэлснээс хойш бүх салбарт хамтын ажиллагаа өргөжиж, зам тээврийн салбарт олон ажил үргэлжилж, эрчимжиж байгаад талархал илэрхийллээ. Талууд энэхүү уулзалтаар тээврийн салбарт хамтран ажиллах боломжтой чиглэлүүд, тэр дундаа автозамыг шинэчлэн сайжруулах, шинээр барих авто замууд, хөрөнгө оруулалтын асуудлаар санал солилцлоо. 

Зам, тээврийн сайд Б.Дэлгэрсайхан тээврийн салбарт хэрэгжүүлэх төсөл хөтөлбөрүүдийн талаар мэдээлэл солилцоод, цаашид  шинээр барих авто замуудыг улс орны хөгжилд хувь нэмэр оруулсан, иргэдийн амьдралд үр өгөөжөө өгсөн, эдийн засгийн ач холбогдол бүхий зам барихад анхаарч ажиллана гэдгээ хэллээ. Мөн шинэ зам тавихдаа дахин цаг хугацааны хувьд сунжирсан, хэл ам дагуулсан, чанаргүй зам барьсан гэх алдаануудыг давтахгүй байхыг хичээж ажиллана гэдгээ тодотголоо.

Түүнчлэн манай улс нэг үеэ бодвол бүх аймгийн төвийг нийслэл хоттой хатуу хучилттай замаар холбож, иргэдийн аюулгүй зорчих боломжийг хангасан. Цаашид авто замын хөдөлгөөний эрчим ихтэй, босоо тэнхлэгийн замуудын засвар өргөтгөлийн ажилд анхаарна гэв. Тухайлбал, Дархан-Алтанбулаг чиглэлийн авто зам, мөн Улаанбаатар Чойр, Сайншанд,  Замын-Үүд, Хөшигтийн хөндий хүртэлх ачаалал ихтэй, хөдөлгөөний эрчим өндөртэй, транзит тээвэр ихтэй замуудыг эхний ээлжинд эрэмбэлж байна. Мөн Ханбогд Цогтцэций, Дундговь, Өмнөговь, Улаанбаатар Хөшигтийн хөндий гэсэн чиглэлийн замыг төр хувийн хэвшлийн түншлэлээр хэрэгжүүлэх төлөвлөгөөтэй байна.  Учир нь эдгээр замууд эргээд эдийн засгийн үр өгөөжөө өгнө хэмээн тооцоолж буйгаа хэлэв.     

Европын сэргээн босголт, хөгжлийн банкны Евразийн дэд бүтэц хариуцсан захирал Екатерина Мирошник “Баярлалаа. Таны өгсөн мэдээлэл бидэнд улс орны хөгжлийг бодсон, хувийн хэвшлийн оролцоог дэмжсэн зөв сонсогдож байна. Европын сэргээн босголт, хөгжлийн банкны гол зорилгуудын нэг бол тогтвортой хөгжлийг хангах болон экологийн хүрээний үйл ажиллагааг дэмжих, хувийн хэвшлийн оролцоог нэмэгдүүлэхэд чиглэдэг. Тиймээс төр хувийн хэвшлийн түншлэлээр хэрэгжүүлэх төслийн загваруудыг бидэнтэй зөвлөлдөж, хамтран ажиллаж болно.

Энэхүү уулзалтад оролцож буй дэд бүтцийн салбарын мэргэжилтнүүд энэ чиглэлд хангалттай туршлага хуримтлуулсан байгаа. Мөн энэ чиглэлээр бид дахин уулзалт товлож санал солилцох боломжтой. Аливаа төслийг зөв төлөвлөж хэрэгжүүлэх тусам төсөл илүү үр дүнгээ өгдөг. Мөн ЗТЯ-наас хийхээр төлөвлөж буй төслүүд дээр хамтран ажиллах боломжуудыг бас хэлэлцэх боломжтой” гэв.