Монгол Улсын  Засгийн газрын гишүүн, Зам, тээврийн сайд Б.Дэлгэрсайхан ОХУ-ын “Нацпроектстрой” групп компанийн ерөнхий захирал Крапивин Алексей Андреевич тэргүүтэй төлөөлөгчдийг хүлээн авч уулзлаа.

Талууд энэхүү уулзалтаар Орос, Монгол хоёр улсын тээврийн салбарын хамтын ажиллагааны талаар санал солилцлоо. Тодруулбал, "Алсын хараа-2050", “Монгол Улсын тогтвортой хөгжлийн үзэл баримтлал-2030” зэрэг Монгол Улсын хөгжлийн урт болон дунд, богино хугацааны бодлогын баримт бичигт тусгагдсан ажлуудын хүрээнд зам, тээврийн салбарт хэрэгжүүлэхээр төлөвлөсөн төсөл хөтөлбөрүүдэд хамтран хэрэгжүүлэх боломжтой ажлуудын талаар мэдээлэл солилцлоо.

 Уулзалтын эхэнд сайд Б.Дэлгэрсайхан хоёр улсын олон жилийн түүхт найрамдалт харилцаа зам, тээврийн салбарт чухал байр суурийг эзэлдэг бөгөөд хамтын ажиллагаа одоо ч мөн идэвхтэй үргэлжилж байгаад талархал илэрхийлсэн юм.

ОХУ-ын "Нацпроектстрой " групп нь монголчууд бидний хувьд олонтаа сонсож буй танил нэр юм. Тус групп нь ОХУ-ын аж үйлдвэрийн салбарт багаггүй туршлага хуримтлуулсан компаниудын нэгдэл бөгөөд авто зам, төмөр зам, боомт, эрчим хүч, дэд бүтцийн салбарыг  хөгжүүлэх чиглэлээр мэргэшсэн аж ахуйн нэгж, байгууллагуудыг нэгтгэсэн том групп юм.  

"Нацпроектстрой " группийн хувьд, 2024 оны 9 сард буюу өнгөрсөн намар ОХУ-ын Ерөнхийлөгч В.В.Путин Монгол Улсад хийсэн төрийн дээд хэмжээний айлчлалын үеэр Монгол, ОХУ, БНХАУ гурван улсын “Эдийн засгийн төв коридор” байгуулах ажлын хүрээнд Зам тээврийн яамтай дэд бүтцийг хамтран хөгжүүлэх чиглэлээр "Хамтран ажиллах санамж бичиг"-ийг байгуулж байсан. 

Тэгвэл энэ удаа хамтын ажиллагааны хүрээнд санамж бичигт тусгасан ажлуудыг бодит ажил хэрэг болгох үүднээс Монгол Улсын Засгийн газрын гишүүн, Зам, тээврийн сайд Б.Дэлгэрсайхан албан ёсны урилга илгээсний дагуу ОХУ-ын “Нацпроектстрой” групп компанийн ерөнхий захирал Крапивин Алексей Андреевич тэргүүтэй төлөөлөгчид Монгол Улсад хүрэлцэн ирээд байгаа нь энэ юм. 

Монгол Улсын урт хугацааны хөгжлийн бодлогод тусгагдсан зорилго, зорилт болон “Шинэ эргэлтийн бодлого”-ын гол хурдасгуур зорилтын нэг бол зам тээврийн салбарт хийгдэх бүтээн байгуулалтын ажлууд юм.

Санамж бичигт гарын үсэг зурснаар талууд дэд бүтцийн салбарт хэрэгжих гол төслүүд дээр хамтран ажиллах боломжтой юм.  Тухайлбал, хамтын ажиллагааны хүрээнд талууд дараах төслүүд дээр хамтран ажиллах боломжтой гэдгээ илэрхийллээ.  Үүнд:           

• Баруун, зүүн, төв болон хойд тээврийн коридорын дагуу хэрэгжих төмөр зам, авто замын төслүүд
• Төмөр замын сүлжээний нэгдмэл байх зарчимд тулгуурлан одоогийн болон шинээр байгуулагдаж буй төмөр замуудын удирдлага, цахимжуулах ажлыг “УБТЗ” ХНН-д түшиглэн хийх төсөл
• Монгол Улсын төмөр замын 1520мм царигтай сүлжээг бүрдүүлэх ажилд хамтран ажиллах төсөл
• Алтанбулаг Замын үүд чиглэлийн хурдны авто замын төсөл зэрэг тус тус болно. Талуудын хамтын ажиллагаанд хэрэгжүүлэхээр төлөвлөж буй дээрхи төслүүд нь зөвхөн BOT хэлбэрийн буюу “Барих-Ашиглах-шилжүүлэх” байдлаар хэрэгжих тухай хэлэлцэв.

Уулзалтад Зам, тээврийн сайд Б.Дэлгэрсайхан болон ЗТЯ-ны холбогдох албаны дарга нар оролцлоо. Энэхүү албан томилолтын хүрээнд ОХУ-н “Нацпроекстрой” групп компанийн ерөнхий захирал А.А.Крапивин тэргүүтэй төлөөлөгчид Ерөнхийлөгчийн Тамгын газрын дарга Г.Занданшатар,  Монгол Улсын Тэргүүн Шадар сайд, Эдийн засаг,  хөгжлийн сайд Л.Гантөмөр болон Нийслэлийн Засаг дарга  Х.Нямбаатар нартай уулзаж, УИХ-ын 2024 оны 21 дүгээр тогтоолоор баталсан “Монгол Улсын Засгийн газрын 2024-2028  оны үйл ажиллагааны хөтөлбөр”-т туссан Зам, тээврийн салбарын төслүүдийг хэрэгжүүлэхэд Талууд харилцан хамтран ажиллах талаар санал солилцсон юм.  

Энэхүү уулзалтад Оросын талаас “Нацпроектстрой” групп компанийн ерөнхий захирал Крапивин Алексей Андреевич, тус компанийн Ерөнхий захирлын Худалдааны асуудал  хариуцсан орлогч Болотский Дмитрий Николаевич нарын төлөөлөгчид оролцлоо.