Зам, тээврийн яамны хамт олон 2024 оны жилийн эцсийн тайлангийн хурлаа өнөөдөр зохион байгууллаа. Хуралд Монгол Улсын Засгийн газрын гишүүн, Зам, тээврийн сайд Б.Дэлгэрсайхан, ЗТЯ-ны Төрийн нарийн бичгийн дарга С.Батболд, Төрийн захиргаа удирдлагын газрын дарга Б.Болор-Эрдэнэ болон нийт ажилтан, албан хаагчид оролцлоо.

Хурлаар салбар тус бүр 2024 онд хийж гүйцэтгэсэн ажлуудаа нэгтгэн дүгнэж, алдаа оноо, амжилт бүтээл, ажлын үр дүнгээ хэлэлцлээ. Мөн 2025 онд хийж хэрэгжүүлэх ажлын төлөвлөгөөг танилцууллаа.  

Хурлын эхэнд, Зам тээврийн сайд Б.Дэлгэрсайхан хэлсэн үгэндээ “Монгол Улсын Засгийн газар “Алсын хараа-2050” урт хугацааны хөгжлийн бодлого,  “Шинэ сэргэлт”-ийн бодлого, Хамтарсан Засгийн газрын 2024-2028 оны үйл ажиллагааны хөтөлбөрийн хүрээнд, дэд бүтэц,  зам тээврийн салбарт онцгой анхаарал хандуулан ажиллаж байна.

Энэ хүрээнд, ачаа тээврийн урсгалыг сайжруулах, хилийн боомтуудын нэвтрүүлэх хүчин чадлыг нэмэгдүүлэх, төмөр замын хил холболтуудыг хийх зэрэг стратегийн чухал ач холбогдолтой, олон жил гацсан томоохон төсөл хөтөлбөрүүдийг хөдөлгөж эхлээд байна.  Тиймээс 2025 онд ЗТЯ-ны алба хаагчид бид бүхэн салбар бүртээ улам ихийг хийж бүтээх, байгуулалтын томоохон ажлуудыг эхлүүлэх болно ”гэдгийг онцоллоо.  

Тайлангийн хуралд салбар тус бүр ажлаа дүгнэж, амжилт бүтээлээ онцоллоо. Тоон мэдээллүүдээс дурдвал, зам тээврийн салбар 2024 онд түүхэн дээд амжилтуудыг шинэчлэн тогтоосон амжилттай үзүүлэлт цөөнгүй байна. Тухайлбал, Зам, тээврийн салбарын нийт ачаа тээвэр оны эцсийн 126.9 сая тонн ачаа тээвэрлэж, тавьсан зорилтоо давуулан биелүүлжээ.  Мөн агаарын тээврээр 2.2 сая зорчигч тээвэрлэсэн нь түүхэн дээд үзүүлэлт болж чадсан байна.

• Салбарын хэмжээнд нийт 146.1 сая зорчигч тээвэрлэж, 2024 оны төлөвлөгөөний биелэлт 98.2 хувьд хүрлээ.

• Агаарын тээврийн үйлчилгээний чанар, стандарт сайжирснаар 2024 онд Монголоор дамжин өнгөрөх агаарын тээврийн зорчигчдын тоо 20 мянга хүрсэн байна.

• Авто замын салбарт 2024 онд нийт 559.5 км хатуу хучилттай авто зам, 173.9 урт метр гүүрийг шинээр ашиглалтад орууллаа. Үүнээс Олон улс, улсын чанартай авто замын сүлжээ 223.5 км хатуу хучилттай авто замаар нэмэгдэж, нийт урт 7750.1 км боллоо.

• Агаарын харилцааны салбарт: 2024 онд Монгол Улс дэлхийн 46 улстай 47 агаарын харилцааны хэлэлцээртэй болж, давхардсан тоогоор 155 цэг рүү шууд нислэг үйлдэх боломж бүрдсэн бөгөөд түүхэндээ анх удаа агаарын тээврээр зорчигчдын тоо 2.2 сая давлаа.

• Хөшигийн хөндийн нисэх онгоцны буудал 2024 оны 11 дүгээр сард хоёр сая зорчигч хүлээн аваад байгаа бол МИАТ ТӨХК түүхэндээ анх удаа жилд нэг сая зорчигч тээвэрлэсэн байна.

Хурлын төгсгөлд, салбартаа олон жил үр бүтээлтэй ажилласан алба хаагчдыг төрийн одон медаль, салбарын шагнал, жуух бичгээр шагнаж урамшууллаа.