Монгол Улсын Шивээхүрэн боомтыг БНХАУ-ын Сэхээ боомттой холбох 6.9 км төмөр замын ажил дууссан цаг саяхан. Монгол Улсын Засгийн газрын 2023 оны  186 дугаар тогтоолоор “Шивээхүрэн-Сэхээ” боомтын хил дамнасан төмөр замын төслийг төр хувийн хэвшлийн түншлэлийн хүрээнд барьж байгуулах эрхийг  “Нарийн сухайтын төмөр зам” ХХК-д  өгсөн. Тус тогтоолын дагуу 2023 оны тавдугаар сарын 27-ны өдөр  Монгол Улсын Ерөнхий сайд Л.Оюун-Эрдэнэ төмөр замын төслийн барилгын ажлын нээлтийг албан ёсоор эхлүүлж байсан.

Шивээхүрэн-Сэхээ боомтыг төмөр замаар холбох нь Монгол Улс, ОХУ, БНХАУ-ын “Эдийн засгийн коридор”-ын хил дамнасан төмөр зам болох баруун босоо тэнхлэгийн Шивээхүрэн-Нарийнсухайт-Арцсуурь чиглэлийн төмөр замын эхлэл болж байгаа юм. Шивээхүрэн-Сэхээ боомтын 6.9 км төмөр замын суурь бүтцийг барьснаар Нарийнсухайтын орд газраас уул уурхайн бүтээгдэхүүнийг төмөр замаар тээвэрлэн экспортод гаргах шинэ хилийн гарцыг нээж, хилийн боомтын нэвтрүүлэх хүчин чадлыг 10 сая тонноор нэмнэ.

“Нарийн сухайтын төмөр зам” ХХК нь “Шивээхүрэн-Сэхээ” боомтын хил дамнасан нарийн царигийн төмөр замын төслийн 6.96 км гол зам, дэлгэмэл уртаараа 19,2 км төмөр зам, ачилт буулгалтын 4 салбар зам бүхий чингэлэг терминал, өртөөний барилга, ажилчдын орон сууц зэрэг суурь бүтцийн барилга байгууламжийг богино хугацаанд чанартай барьж гүйцэтгэсэн байна. Тус ажлыг Зам, тээврийн яам, Барилга, хот байгуулалт, орон сууцжуулалтын яамны бүрээлдэхүүнтэй улсын комисс 2024 оны арванхоёрдугаар сард ажиллаж, байнгын ашиглалтад оруулсан байна.

Тус боомтоор жилд дунджаар 10-18 сая тонн эрдэс баялаг, уул уурхайн бүтээгдэхүүн экспортолж байна. Энэхүү хүчин чадлыг өсгөх боломж нь төмөр замын тээвэр бөгөөд хүчин чадал өсөж, 30-35 сая.тонн болгон боомтын хүчин чадлыг өсгөх нэмэгдүүлэх боломжтой.

Ийнхүү Монгол Улсын төмөр замын салбарт тус төмөр замын ашиглалтыг хариуцсан “Шивээхүрэн төмөр зам” ХХК гэх их айл нэгээр нэмэгдлээ.