Бүгд Найрамдах Ардчилсан Лаос улсад албан томилолтоор ажиллаж байгаа Монгол Улсын Зам тээврийн сайд Б.Дэлгэрсайхан “Таналенг” хуурай боомтын үйл ажиллагаатай танилцаж, туршлага солилцов.

Вьентьян ложистик паркын тус боомт нь олон улсын ач холбогдол бүхий есөн хуурай боомтын нэгээр нэрлэгдсэн бөгөөд төмөр зам, авто замаар ачааг шилжүүлэн ачих байгууламжаар хангагдсан боомт юм. 

Таналенг хуурай боомт нь бүх төрлийн гаалийн үйл ажиллагаа явуулж, олон улсын худалдааны төв, удирдлагын төв, орчин үеийн тоног төхөөрөмж, агуулахын системийг мэргэжлийн түвшинд суурилуулж, олон тооны чингэлэг тээвэрлэх боломжтой терминалын үйлдлийн системийг ашиглан түргэн шуурхай, найдвартай үйлчилгээг үзүүлэн ажиллаж байна.

Таналенг өртөөний барилгын ажил 2007 онд эхэлж, 2009 онд ашиглалтад орсон.

Лаос-Хятадын төмөр зам 2021 оны арванхоёрдугаар сард ашиглалтад орсноос хойш 2024 оны 8 дугаар сарын байдлаар Лаос-Хятадын төмөр замаар 40.77 тэрбум юань (5.74 тэрбум ам.доллар)-ын үнэ бүхий 10 сая гаруй тонн ачаа тээвэрлээд байна.

Боомтоор хөдөө аж ахуйн гаралтай бүтээгдэхүүний тээвэрлэлт нэмэгдэж байгаатай холбогдуулан тус боомтод ариун цэвэр, ургамал хорио цээрийн хяналтын нэгж болон ургамлын эрүүл ахуйн (SPS) үйлчилгээний төвийг байгуулахаар ажиллаж байна.

Далайд гарцгүй БНАЛАУ-ын Засгийн газар Таналенг хуурай боомтоор хуурай газар болон төмөр зам, далай, агаарын замаар дэлхийн зах зээлд нэвтрэх боломжийг олгодог бүс нутгийн хэмжээнд стратегийн хувьд төвлөрсөн транзит тээврийн төв болгох зорилтыг тавин ажиллаж байна.

Энэ хүрээнд  Вьетнамын Ха Тин муж дахь Вунг Анг далайн боомтыг Вьентьян дахь Таналенг хуурай боомттой төмөр замаар холбохоор төлөвлөсөн. Энэ төсөл нь БНАЛАУ-ын Засгийн газрын стратегийн чухал төслийн нэг бөгөөд далайд гарцгүй БНАЛАУ-ыг далайд гарцтай улс болгон хувиргаж (Land Lock-Link), бүс нутаг болон дэлхийн бусад улс орнуудтай холбоо тогтоох боломжтой болно гэж үзэж байгаа юм.

Вьентьян Ложистик Парк нь газарзүй, стратегийн чухал байршилд байрлаж байгаа тул  АСЕАН, БНХАУ, Европын улс, орнуудын хоорондын худалдааг өргөжүүлэх төв болгон Зүүн Өмнөд Азийн улс орнуудыг БНХАУ-тай хуурай замаар холбосон чухал гарц болж байгаагаараа онцлогтой юм. Хятад-Европын төмөр замын сүлжээгээр тухайн орнуудын ачаа тээврийг далайн тээврээс нэг дахин богино хугацаанд Европын зах зээлд нийлүүлэх боломжтой болж байгаа юм.