Зам, тээврийн сайд Б.Дэлгэрсайхан Лаос Улсын Вьентьян хотноо болсон Монгол, Лаосын Засгийн газар хоорондын комиссын 12 дугаар хуралдааны хүрээнд 2025 оны нэгдүгээр сарын 27-ны өдөр Лаос Улсын Нийтийн ажил үйлчилгээ, тээврийн сайд Нгампасунг Мөангманитай уулзаж, хоёр улсын тээврийн салбарын хамтын ажиллагааны талаар санал солилцов.

Сайд Б.Дэлгэрсайхан Монгол Улс, Бүгд Найрамдах Ардчилсан Лаос Ард Улсын Засгийн газар хоорондын комиссын Монголын хэсгийн даргаар томилогдон ажиллах болсонд баяртай байгаагаа илэрхийлж, хоёр улсын харилцаа хамтын ажиллагааг бүх салбарт өргөжүүлэн хөгжүүлэх, тэр дундаа худалдаа, эдийн засгийн харилцаа, бизнес хөрөнгө оруулалт, аялал жуулчлал, иргэд харилцан зорчиход чухал ач холбогдолтой тээврийн хамтын ажиллагааг хөгжүүлэхэд өөрийн зүгээс хүчин чармайлт гарган ажиллахаа илэрхийлэв.

Монгол, Лаос хоёр улс нь хүн ам цөөн, газар нутаг том, далайд гарцгүй зэрэг ижил төстэй зүйлс олон тул аль аль нь тээврийн сүлжээгээ оновчтой зөв хөгжүүлэх, дамжин өнгөрөх тээврийн хүчин чадлаа нэмэгдүүлэхэд онцгой анхаарч ажилладаг болохыг онцолж, өөр өөрийн онцлог байдал, мэдлэг туршлагаас хуваалцах олон боломж байгааг сайд Б.Дэлгэрсайхан тэмдэглэв. Энэ хүрээнд Монголын талын төлөөлөгчид Лаос улсын Таналенг хуурай боомт болон Вьентианы логистикийн паркад зочлон очиж газар дээр нь үзэж танилцсан гэдгийг онцлов.

Мөн Лаосын Засгийн газар БНХАУ-тай хамтран Лаос, Хятадыг холбосон 413 км хурдны төмөр замыг 2021 онд амжилттай барьж ашиглалтад оруулсныг сайшаан баяр хүргэж, Зам, тээврийн яамны ажлын хэсэг 2024 оны 11 дүгээр сард Лаост ирж уг төмөр замтай танилцан туршлага судалсан гэдгийг хэлж Монгол Улсад хийхээр төлөвлөж буй төмөр замын төслүүдийн талаар товч танилцуулав.  Төмөр замаар хоёр улсын хороонд ачаа тээвэрлэлтийг Төмөр замуудын хамтын ажиллагааны байгууллага /ОСЖД/-ын дүрэм журам, үйл ажиллагааны хүрээнд хийхэд нээлттэй байгаа тэмдэглэн хэлж удахгүй 2025 оны 03 дугаар сард Улаанбаатар хотноо болох ОСЖД байгууллагын зөвлөгөөнд Лаосын талыг ирж оролцохыг урив.

Автотээврийн салбарт Монгол, Лаос улсуудыг холбосон авто тээврийн коридорыг бий болгох талаар өмнө хийгдсэн айлчлалуудын үеэр хөндөгдөж байсан ба автотээврийн харилцааг хөгжүүлэх эрх зүйн үндэс болох боломжтой Азийн авто замын сүлжээгээр олон улсын тээвэрлэлт гүйцэтгэх тухай Монгол, Орос, Хятад гурван улсын Засгийн газар хооронд байгуулсан хэлэлцээрт нэгдэн орохыг Лаосын талд санал болгов. Уг хэлэлцээрт бусад улсууд нэгдэн орох боломжтой ба Лаос Улс нэгдсэнээр Монгол Улс руу тээвэрлэлт хийх төдийгүй дамжин өнгөрч ОХУ руу тээвэр хийх боломжтой болно гэдгийг тэмдэглэв.

Сайд Б.Дэлгэрсайхан хоёр улсын хооронд аялал жуулчлалыг хөгжүүлэх боломжийг нэмэгдүүлэх, дэмжих агаарын харилцаа чухал болохыг тэмдэглэн хэлж 2023 онд байгуулсан Агаарын харилцааны тухай хэлэлцээрийг ажил хэрэг болгоход анхаарч хамтран ажиллахыг санал болгов. Монголын тал хоёр улсын хооронд шууд болон захиалгат нислэг, улирлын чанартай нислэгийг хийх сонирхсон агаарын тээвэрлэгчдийг дэмжиж ажиллахад бэлэн байгаагаа илэрхийлэв.

Лаос Улсын Нийтийн ажил үйлчилгээ, тээврийн сайд Нгампасунг Мөангмани Монгол Улсын Зам, тээврийн сайдын түвшинд Лаос Улсад анх удаа айлчлан ирж байгаад баяртай байгаагаа илэрхийлж хоёр улсын Засгийн газар хоорондын ээлжит хуралдаан багагүй хугацаанд хойшилсны дараа ийнхүү болсонд баяртай байгаа ба хоёр талын хамтын ажиллагааг бүх салбарт ахиулан хөгжүүлэх чухал хурал болно гэдэгт итгэж байгаагаа хэлэв.

Сайд Нгампасунг Мөангмани Зам, тээврийн сайд Б.Дэлгэрсайханы хэлсэн санал бодлыг бүрэн дэмжиж санал нэгдэж байгаагаа илэрхийлж хоёр улсын эдийн засгийн хамтын ажиллагааны үндэс нь тээврийн харилцаа болох тул хоёр яамны хамтын ажиллагаа нь чухал үүрэгтэй гэдгийг хэлэв.  Хоёр улсын хоорондын худалдааны хэмжээ бага байгаа хэдий ч цаашид нэр төрлийг нэмэгдүүлэх, өөр өөрийн онцлог бараа бүтээгдэхүүнийг солилцох сонирхол багагүй байгаа, тухайлбал Лаос Улс нь Монголоос мах, махан бүтээгдэхүүн авах, Монголд жимс, ногоо болон мод модон бүтээгдэхүүнийг нийлүүлэх боломжтой тул тээвэр логистикийн асуудлыг шийдэхэд хоёр тал анхаарч хамтран ажиллахыг санал болгов. Мөн хоёр улс далайд гарцгүй орнууд тул хөрш орнуудаар саадгүй дамжин өнгөрөх, хилийн боомт холболт, далайн тээврийн чиглэлээр харилцан туслалцах, ялангуяа НҮБ болон бусад олон талт хамтын ажиллагааны механизмуудад харилцан дэмжиж ажиллах нь чухал болохыг онцлон хэлэв.