Монгол Улсын Засгийн газрын гишүүн, Зам, тээврийн сайд Б. Дэлгэрсайхан өнөөдөр Бүгд Найрамдах Азербайжан Улсын Гадаад хэргийн дэд сайд Элнур Маммадов тэргүүтэй төлөөлөгчдийг хүлээн авч уулзлаа.

Зам, тээврийн сайд Б.Дэлгэрсайхан уулзалтын эхэнд хоёр улсын төрийн тэргүүн нарын айлчлалын бэлтгэл ажлын хүрээнд, Монгол Улсын Зам тээврийн яаманд хүрэлцэн ирж, тээврийн салбар дахь олон талт хамтын ажиллагааг өргөжүүлэн хөгжүүлэх талаар  санал солилцож буйд талархлаа илэрхийллээ.

Уулзалтаар талууд хоёр улсын Засгийн газрын бодлого, зорилтын талаар  харилцан мэдээлэл солилцож, Монгол, Азербайжан хоёр улсын тээврийн салбарын хамтын ажиллагааг бүх салбарт хөгжүүлэх боломжуудын талаар дэлгэрэнгүй ярилцлаа.

Тухайлбал, Монгол Улсын зам тээврийн салбар Төв Ази болон Зүүн Европын улсуудтай тээврийн салбарын хамтын ажиллагааг хөгжүүлэх хүрээнд Азербайжаны олон улсын тээврийн салбарын гол зангилаа болсон төмөр замын сүлжээ, авто тээврийн холболтуудыг ашиглаж, Ази Европыг холбосон шинэ тээврийн гарц бий болгох, ачаа тээврийн хүчин чадлыг нэмэгдүүлэх чиглэлд хамтран ажиллах саналыг дэвшүүлсэн юм.

Мөн энэ хүрээнд 2025 оны 1 сард Бүгд Найрамдах Турк Улсад Монгол Улсын Ерөнхийлөгч У.Хүрэлсүх төрийн айлчлал хийх үеэр  хоёр улсын Зам тээврийн яам хооронд “Харилцан ойлголцлын санамж бичиг”-т гарын үсэг зурсан. Бидний зүгээс Транс-Сибирийн коридороос гадна Хятад, Казахстанаар дамжин дунд замаар Европын орнууд руу холбогдох, тээврийн салбарт шинэ гарц нээх үүднээс Хятад болон Туркийн талтай хамтран ажиллах боломжуудыг эрэлхийлэн ажиллаж байгааг хэллээ.

Мөн энэ үеэр салбарын сайд Б.Дэлгэрсайхан Монгол Улсын Хамтарсан Засгийн газраас ирэх дөрвөн жилд  хэрэгжүүлэхээр төлөвлөж буй 14 мега төсөл, нийслэл хотод 2025 онд  хэрэгжүүлэх бүтээн байгуулалтын томоохон ажлуудын талаарх мэдээллийг өгч хоёр улсын тээвэр логистикийн салбарт бодит үр дүнтэй хамтын ажиллагаа өрнүүлэх хүсэлтэй байгаагаа илэрхийлсэн юм.  

2025 онд Азербайжан Улсын Ерөнхийлөгч Ильхам Алиев Монгол Улсад айлчлах гэж байгаатай холбогдуулан Монгол Улсын Зам тээврийн яамнаас Бүгд Найрамдах Азербайжан Улстай “Олон Улсын Автотээврийн харилцааны тухай”болон “Агаарын харилцааны тухай” Монгол Улсын Засгийн газар, Азербайжан Улсын Засгийн газар хоорондын хэлэлцээр”-ийг байгуулах хүсэлтэй байгааг уламжлав.

Бүгд Найрамдах Азербайжан Улсын Гадаад хэргийн дэд сайд Элнур Маммадов Зам тээврийн сайдыг цаг, зав гарган хүлээн авч уулзаж буйд талархал илэрхийлээд, 2024 оны 11 дүгээр сард Монгол Улсын Ерөнхийлөгч У.Хүрэлсүх Азербайжан Улсын нийслэл Баку хотноо зохион байгуулагдсан НҮБ-ын Уур амьсгалын өөрчлөлтийн суурь конвенцын 29 дүгээр бага хуралд оролцох үедээ хоёр улсын хамтын ажиллагааны талаар өргөн хүрээтэй санал солилцсоныг дурдлаа.

Монгол, Азербайжан хоёр улсын зам тээврийн салбарт хамтран ажиллах боломжууд, онцлох зүйлсийн талаарх зарим мэдээллийг дуулгалаа.

Тухайлбал, Азербайжан улс газрын тос, байгалийн хийгээр эдийн засгийн гол орлогоо төвлөрүүлдэг. Тус улсын Засгийн газраас эдийн засгаа солонгоруулахын тулд  бусад салбараа хөгжүүлэх, тэр дундаа тээврийн салбартаа ихээхэн ач холбогдол өгч ажиллаж байна. Азербайжан улсын хувьд сүүлийн жилүүдэд олон улсын автотээврийн зах зээлийг хөгжүүлэх, тээвэрлэгч компаниудын тоог нэмэгдүүлэх, агаарын тээвэр, усан тээврийн салбарт парк өргөтгөх ажлуудыг хийж байгааг онцлоод, Каспийн тэнгисийн далайн тээврийн боомт, агаарын тээвэр, усан онгоцны парк, хөлөг онгоцны үйлдвэрлэл зэрэг томоохон төслүүдийн талаар дэлгэрэнгүй танилцууллаа.

Мөн тэрээр “Монгол, Ажербайжан улс хоёулаа далайд гарцгүй орон. Иймд хоёр улсын хувьд тээврийн салбарын  олон улсын маршрутыг ашиглах, дамжин өнгөрөх тээврийг хэрэгжүүлэхэд зам тээврийн салбар дахь харилцаа холбоо чухал үүрэгтэй. Энэ удаагийн албан уулзалт, Монгол Улсын Зам, тээврийн сайд Б.Дэлгэрсайхан таны тавьсан санал хүсэлтийг Ажербайжан Улсын Зам тээврийн яаманд биечлэн танилцуулж ажил хэрэг болгох болно гэдгийг  онцлон тэмдэглэлээ.

Уулзалтын төгсгөлд талууд хоёр улсын хамтын ажиллагааг өргөжүүлэн, хөгжүүлэхийн төлөө идэвхтэй хамтран ажиллахаа илэрхийлэв.