Замын хөдөлгөөний аюулгүй байдлын үндэсний зөвлөлийн Ажлын албаны дарга Т.Эрхэмбаатараар ахлуулсан ажлын хэсэг Говьсүмбэр, Дорноговь аймаг, Замын-Үүд суманд ажиллаж байна. Тус ажлын хэсэг Зам, тээврийн сайдын баталсан удирдамжийн дагуу замын хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг, зөрчлөөс урьдчилан сэргийлэхэд зөвлөгөө өгч, цаашид авах арга хэмжээний санал, шийдвэрийн төсөл боловсруулах юм.

Ажлын хэсэг Дорноговь, Говьсүмбэр аймгийн нутаг дэвсгэрээр дамжин өнгөрөх улсын болон орон нутгийн чанартай автозамд хяналт шалгалт хийж, нийт 350 тээврийн хэрэгсэл шалгаж, жин хэмжээ хэтрүүлсэн болон гэрэлтүүлэх хэрэгсэл хэрэглэх дүрэм зөрчсөн 67 зөрчилд шийтгэл ногдуулжээ.

Мөн олон улсын чанартай АН-3 чиглэлийн автозам, замын байгууламжийн үзлэг шалгалтыг хийж, нийт 140 хэсэгт 4.000м.кв авто замын нүхэн эвдрэл засварлах, гурван байршилд авто замын далан, хөвөө сэргээх, 79 ширхэг тэмдэг, техник хэрэгслийг засварлах, 86 ширхэг тэмдгийг шинээр суурилахаар төлөвлөж, зам хариуцагч байгууллагыг мэргэжил арга зүйгээр ханган ажиллаж байгаа юм.