Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.04.01) “Багахангай-Хөшигийн хөндий” чиглэлийн салбар төмөр зам барих ажлаар төмөр замын компаниудын удирдлагуудтай зөвлөлдөх уулзалтыг хийлээ.

Зам тээврийн яамнаас зохион байгуулсан энэхүү уулзалтад Монгол Улсад автозам, гүүрний чиглэлээр барилгын ажил эрхэлж буй компаниудын төлөөллөөс бүрдсэн 100 гаруй мэргэжилтэн оролцлоо. Уулзалтаар Зам, тээврийн сайд Б.Дэлгэрсайхан Монгол Улсын эдийн засгийн суурийг тэлэх, "Алсын хараа-2050" бодлогын хүрээнд Төв аймгийн Сэргэлэн сумын нутаг дэвсгэр, Хөшигийн хөндийд “Эдийн засгийн чөлөөт бүс, үйлдвэржилт, тээвэр логистикийн бүс бүхий 150 мянган хүн суурьших дагуул хот байгуулахаар төлөвлөж байгааг онцлоод, Хөшигийн хөндий дэх тээвэр логистикийн төв, терминал хүрэх төмөр замын барилгын ажилд дотоодын компаниудаа дайчилж, монгол инженерүүдийн гараар энэ ажлыг богино хугацаанд чанартай хариуцлагатай хийхээр төлөвлөж буйгаа дэлгэрэнгүй танилцууллаа.

Мөн төмөр замын компаниудын сонирхсон асуултад хариулж, хариуцлагатай харилцан уялдаатай хамтран ажиллаж, нийслэлийн дэд бүтцийг дэмжих зорилгоор баригдахаар төлөвлөгдөж буй Багахангай-Хөшигийн хөндий чиглэлийн төмөр замын барилгын ажлыг барьж дуусгахаар төлөвлөж байгаа талаар харилцан санал солилцож, хамтран ажиллах боломжуудын талаар хэлэлцлээ.

Төслийн хувьд, Хөшигийн хөндий чиглэлд баригдах  тээвэр логистикийн төв, терминал хүрэх төмөр зам барих асуудлыг Засгийн газрын 2025 оны нэгдүгээр сарын 14-ний өдрийн хуралдаанаар хэлэлцэж дэмжээд байгаа юм.  

Энэхүү шинээр баригдах салбар төмөр зам нь “Улаанбаатар төмөр зам” Хувь нийлүүлсэн нийгэмлэгийн “Багахангай” өртөөнөөс салбарлан Төв аймгийн Сэргэлэн сумын урдуур дамжин, Олон Улсын шинэ нисэх онгоцны буудлын урагш чиглэн Хөшигийн хөндийд төлөвлөгдөж буй төмөр замын шугам юм.

Төмөр замын шугам нь нийт 102 км урт дан замтай, 2 өртөө, 4 зөрлөгтэй, 2,5 км урт орчим гүүрэн байгууламжтай байхаар төлөвлөгдөж байгаа бөгөөд барилгын ажлыг 2025 оны дөрөвдүгээр сарын сүүлчээр эхлүүлж, наймдугаар сарын 20-ноор дуусгахаар төлөвлөж байгааг танилцуулав.

Мөн энэ үеэр  сайд Б.Дэлгэрсайхан Монгол Улсын зам, тээврийн салбарын дэд бүтцийг хөгжүүлэх, тээвэр логистикийг хөгжүүлэх томоохон зорилгын дор төмөр замын тээврийн салбарын гүйцэтгэх үүрэг оролцоо ч бас цаашид  улам нэмэгдэж буйг онцлоод Зам тээврийн яамнаас энэ онд хэрэгжүүлэх  томоохон төслүүдэд цаашид ч бас хамтран ажиллах боломжуудыг хэлэлцлээ.