Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.04.01) “Тавантолгой төмөр зам” ХХК, “Монголын төмөр зам” ТӨХК-иудын удирдлагууд, ажилтан алба хаагчидтай уулзлаа.

Уулзалтаар Зам тээврийн сайд Б.Дэлгэрсайхан ашиггүй ажилладаг төрийн өмчит төмөр замын компаниудыг нэгтгэх тухай Засгийн газрын тогтоол шийдвэрийг танилцуулаад, төрийн өмчит компаниудын төмөр замын бүтээн байгуулалтад зарцуулсан хөрөнгө, ажлын үр дүн, эдийн засгийн үр ашиг хангалтгүй байгааг тооцоо судалгаатай тодорхой дурдлаа.

Ингэхдээ төмөр замын салбарт адил төстэй үйл ажиллагаа эрхэлж буй хувийн компаниудын үйл ажиллагаатай харьцуулсан дүгнэлтүүдийг дурдаж, төрийн өмчид байгаа төмөр замын компаниудыг бүтэц орон тоог нэгтгэж, ажлын бүтээмж, менежментийг нь сайжруулах ажлыг шат дараатай хийж эхлээд байгааг мэдээлсэн юм.

Одоогоор “Тавантолгой төмөр зам” ХХК 800 хүнтэй, “Монголын төмөр зам” ТӨХК 600 гаруй хүнтэй ажиллаж байна. Бүтэц орон тооны өөрчлөлтийг хуульд нийцүүлэн хэрхэн яаж хийх тухай мөн дэлгэрэнгүй танилцууллаа.

Засгийн газрын хуралдаанаас гаргасан төмөр замын төрийн өмчит компаниудыг нэгтгэх шийдвэрийн дагуу “Тавантолгой төмөр зам” ХХК, “Монголын төмөр зам” ТӨХК-иудын шинэ бүтэц орон тоо, ажлын хариуцлага, үр ашгийн тооцоо судалгааг хийж дууссан бөгөөд ажилтнуудыг нь чөлөөлөх, сонгон шалгаруулалтаар дахин ажилд томилох ажлыг энэ долоо хоногоос хийж эхэлнэ гэв.

Хурлын үеэр төмөр замын компаниудын Үйлдвэрчний эвлэлийн хороо, ажилчдын сонирхсон асуултад хариулт өгөв.