“Монголын төмөр зам” ТӨХК-ийн Төлөөлөн удирдах зөвлөлийн дарга Б.Артур, Гүйцэтгэх захирал О.Батчулуун тэргүүтэй төлөөлөгчид БНХАУ-д албан томилолттой ажиллав.

Төлөөлөгчид юуны өмнө  “Чайна энержи” группийн удирдлагатай Бээжин хотноо уулзав. Уулзалтын үеэр “Эрдэнэс Тавантолгой” ХК-иас худалдан авах “Чайна энержи” группийн нүүрсийг төмөр замаар тээвэрлэх нөхцөлийн талаар хэлэлцлээ. Улмаар “Эрдэнэс тавантолгой” ХК-иас худалдан авах таван сая хүртэлх тонн ачааг Тавантолгой-Гашуунсухайт чиглэлийн төмөр зам, авто тээврийн холимог маягийн тээврээр тээвэрлэх асуудлаар үргэлжлүүлэн нарийвчлан ярилцахаар болж, төмөр замаар тээвэрлэх зарчмын тохиролцоонд хүрэв.

Дараа нь “Чайна энержи” группийн охин компани болох “Баошэн төмөр зам” компанийн удирдлагатай Бугат хотноо уулзлаа.

Энэ үеэр “Монголын төмөр зам” ТӨХК, “Баошэн төмөр зам” компанитай хамтран Тавантолгойн уурхайгаас Ганц мод өртөө хүртэл нүүрс тээвэрлэлтийг холимог тээврийн хэрэгслээр зохион байгуулах мөн 1955 оны “Монгол-Хятадын хилийн төмөр замын хэлэлцээр”-ийг хоёр улсын Засгийн газрын хэлэлцээр болгох ажлын хүрээнд хилийн өртөөнд галт тэрэг солилцох асуудлыг хоёр төмөр замын компани ажлын хэсэг байгуулан хамтран ажиллахаар тохиролцов.

Мөн Тавантолгой-Гашуунсухайт болон Ганцмод-Жинцуан чиглэлийн төмөр замын тээврийн хамтын ажиллагааг эхлүүлэх, зохион байгуулалтыг сайжруулах, тээвэрлэлтийг хамтран нэмэгдүүлэх, хил дамнасан төмөр замын нээлт хамтран зохион байгуулах, барилгын ажлыг богино хугацаанд гүйцэтгэх, хилийн төмөр замын хэлэлцээрийг аж ахуйн нэгж хооронд эхлүүлэх асуудлаар Чайна Энержи Баошен төмөр замын ТУЗ-ын дарга Биен Липинтэй санал солилцож, амжилттай тохиролцлоо.