Монгол Улсын Засгийн газрын гишүүн, Зам, тээврийн сайд Б.Дэлгэрсайхан Европын Холбооноос Монгол Улсад суугаа Элчин сайд хатагтай Ина Марчюлёните болон Европын хөрөнгө оруулалтын банкны төлөөлөгчдийг өнөөдөр (2025.04.08) хүлээн авч уулзлаа.

Уулзалтаар талууд Монгол Улс, Европын Холбооны орнуудтай явуулж буй тээврийн салбар дахь хамтын ажиллаагааг өргөжүүлэх, ялангуяа Монголд хэрэгжих тодорхой төслүүдэд Европын хөрөнгө оруулалтын банкнаас санхүүжилт олгох боломжуудын талаар санал солилцлоо.

Зам, тээврийн сайд Б.Дэлгэрсайханы зүгээс Монгол Улсад айлчилж буй Европын хөрөнгө оруулалтын банкны багийханд талархал илэрхийлээд банкны зүгээс сонирхож болохуйц зарим төслүүдийн талаар мэдээлэл өгч ярилцав. Зам, тээврийн яамны зүгээс төлөвлөгөөнд тусгагдсан санхүүжилтийн эх үүсвэрийг хараахан шийдвэрлэгүй байнаа Лүн-Хархорин чиглэлийн замыг дөрвөн эгнээ болгон өргөтгөн шинэчлэх, мөн Замын-Үүд – Хөшигийн хөндий чиглэлийн босоо тэнхлэгийн замыг дөрвөн эгнээ болгон өргөтгөх төслүүдийг хэрэгжүүлэхэд Европын хөрөнгө оруулалтын банктай хамтран ажиллах сонирхолтой байгаагаа илэрхийлж хэрэв банкны зүгээс тавигдах шаардлагуудыг хангаж, зээл санхүүжилт олгох боломжтой гэж үзсэн тохиолдолд цаашид нарийвчлан яриа хэлэлцээ хийхэд бэлэн байгааг илэрхийлэв.  

Сайдын зүгээс эдгээр замуудын ач холбогдлыг тайлбарлахдаа “Тус зам нь манай улсын нийт импортын ачаа тээврийн 78 хувийг тээж өнгөрүүлдэг эдийн засгийн өндөр ач холбогдолтой тээврийн коридор бөгөөд бүс нутгийн хэмжээд чухал үүрэг гүйцэтгэдэг. Замын-Үүдийн боомт нь мөн экспорт, импортын гол зангилаа боомт юм.  Тиймээс энэ замын тээх нэвтрүүлэх хүчин чадлыг нэмэгдүүлэх, хөдөлгөөний аюулгүй байдлыг сайжруулах зайлшгүй шаардлага бий болсон. Тиймээс хоёр хөршийг холбож буй 1000 орчим км замыг нийт уртаар нь 4 эгнээтэй болгон өргөтгөх болно. Мөн энэ зам нь хөдөлгөөний эрчим, ачаалал өндөртэй тул цаашлаад эдийн засгийн үр өгөөжтэй байх бүрэн боломжтой зам юм. Тиймээс Зам, тээврийн яамны барьж буй бодлого бол төсөвт орлого оруулах боломжтой, эдийн засгийн үр өгөөжтэй, хамгийн ачаалалтай замууддаа тэргүүн ээлжид хөрөнгө оруулалт хийхийг зорьж байгаа. Эдгээр замууд нь зам барихад авсан зээлийг эргэн төлөхөд тодорхой орлогыг бүрдүүлэх шаардлагатай” гэдгийг онцоллоо.

Элчин сайд хатагтай Ина Марчюлёните болон Европын хөрөнгө оруулалтын банкны төлөөлөгчдийн зүгээс сайд Б.Дэлгэрсайханы зүгээс санхүүжилт шаардлагатай төслүүдийн талаар дэлгэрэнгүй мэдээлэл өгсөнд талархал илэрхийлж төслүүдийн талаар мэдээлэл болон судалгааг ирүүлэхийг хүсэв.

Европын Холбооны Элчин сайд Ина Марчюлёните өмнө нь Лаос Улсад Элчин сайдаар ажиллаж байсан ба тус улсын зам, тээврийн салбарыг хөгжүүлэхэд замыг шинэчлэх ажилд хамтран ажиллаж байсан тухайгаа хэлэв. Манай баг тээврийн салбарт ажиллаж байсан туршлагатай хүмүүс тул энэхүү туршлага Монгол Улсад хэрэгжүүлэх хүсэлтэй байна. Танайхаас тавьсан хоёр төслийг судалж үзээд, зээлийн шаардлагад нийцэж байгаа эсэхийг судална. Хэрэв манай нөхцөл шаардлагад нийцэж байвал хоёр талаас цаашид гүнзгийрүүлэн тохиролцож ажиллана” гэдгээ хэллээ.

Уулзалтын төгсгөлд, Европын Холбооноос Монгол Улсад суугаа Элчин сайдын яамнаас Монгол, ОХУ, БНХАУ-д үйл ажиллагаа явуулж буй Европын компани, аж ахуйн нэгжүүдийг хамруулсан бизнес форумыг Улаанбаатар хотод 2025 оны аравдугаар сарын 13-14-ний өдрүүдэд зохион байгуулах бөгөөд уг форумд Зам, тээврийн яамыг оролцож төслүүдээ танилцуулах боломжтой мэдэгдлээ.