Зам, тээврийн яамны Төрийн нарийн бичгийн дарга С.Батболд “Баян зам тээвэрчдийн холбоо”-ны төлөөллийг хүлээн авч уулзаж, шаардлагынх нь хариуг өглөө.

“Баян зам тээвэрчдийн холбоо”-ны нүүрс тээвэрчид нүүрс тээвэрлэлттэй холбоотой асуудлаар шаардлага хүргүүлсэн юм.

Шаардлагын талаар Төрийн нарийн бичгийн дарга С.Батболд хэлэхдээ “Бид та бүхний шаардлагыг хүлээж аваад, судалж үзсэний эцэст дан ганц Зам, тээврийн яамны шийдвэрлэх асуудал биш хэмээн үзээд холбогдох яамд, байгууллагууд руу алба бичиг хүргүүлж байна. Дэлхий нийтэд үүсээд буй асуудлаас шалтгаалан нүүрсний үнэ дэлхийн зах зээлд унаж байгаа бөгөөд Ерөнхий сайдын захирамжаар уул уурхайн бүтээгдэхүүний экспортыг нэмэгдүүлэх, валютын нөөцийг нэмэгдүүлэх үүрэг бүхий Ажлын хэсэг байгуулагдан ажиллаж байгаа. Энэхүү ажлын хэсгийн бүрэлдэхүүнд Сангийн сайд, Аж үйлдвэр, эрдэс баялгийн сайд, Зам, тээврийн сайд, Боомтын үндэсний хорооны дарга болон олборлолтын үйл ажиллагаа эрхлэгч төрийн өмчит аж ахуйн нэгжүүдийн удирдлагууд ажиллаж байгаа юм. Иймээс нүүрсний тээвэрлэлттэй холбоотой асуудлыг бид танилцуулах боломжтой гэж үзэж байна” гэлээ.

Мөн тээвэрчдийн зүгээс тавьж буй асуудлуудтай холбоотойгоор Зам, тээврийн яамнаас Аж үйлдвэр, эрдэс баялгийн яам, “Эрдэнэс Тавантолгой” ХК зэрэг байгууллагуудад санал хүргүүлж байгаа юм.