Зам, тээврийн сайд Б.Дэлгэрсайхан, ЗТЯ-ны харьяа байгууллагын дарга удирдлагууд өнөөдөр “Монголын түлш тээвэрлэгчдийн Өлзийт зам холбоо” ТББ-ын төлөөллийгхүлээн авч уулзан санал солилцлоо.

Энэ нь шатахуун тээвэрлэгчдийн зүгээс санал солилцож буй хоёр дахь уулзалт бөгөөд шатахуун тээвэрлэгчдийн асуудал шийдлээ олоогүй тул Зам, тээврийн сайд Б.Дэлгэрсайхантай ийнхүү биечлэн уулзаж байна.

Уулзалтаар “Зам тээврийн хөгжлийн төв” ТӨҮГ-аас гаргасан зөвшөөрөгдөх дээд хэмжээ буюу 44 тонноос хэтэрсэн задрах боломжгүй ачаа тээвэрлэлтийг дөрөвдүгээр сарын 5-наас тавдугаар сарын 1 хүртэл түр хугацаанд зогсоох шийдвэр гарсантай холбогдуулан тээвэрчдийн ачаа тээврийн жин, тонн зөрсөн, тээвэрчдийн эрх зөрчигдсөн талаарх мэдээллийг сонслоо.

Зам, тээврийн сайд Б.Дэлгэрсайхан урин дулааны улиралд газрын хөрс гэсэж, замын даац буурдаг,  орон нутгийн замд эвдрэл гэмтэл ихээр үүсэх, зам цөмрөх зэргээс үүдэн зам засварт зарцуулсан улсын төсөв үнэгүйдэх, улмаар осол аваар гарч хүний амь нас эрсдэх эрсдэл өндөр байгааг анхааруулаад, Монголд төдийгүй олон улсад мөрддөг стандартын дагуу 44 тонн гэсэн стандарт хэмжээг барьж ажиллахыг онцоллоо.

Тодруулбал, “Манай улсад автозамын даацын хяналтыг MNS 4598:2025 буюу “Автотээврийн хэрэгслийн техникийн байдалд тавих ерөнхий шаардлага”-аар зохицуулдаг. Үүнд нэг тэнхлэг дээрх жин 11 тонн, нийт жин 44 тонноор тодорхойлсон байдаг. Энэ нь Монголд төдийгүй олон улсадмөрддөг стандарт. Иймд түлш тээврийн ачааны автомашины бүх жингийн нийлбэр нь дээрх стандартад нийцэж байх ёстой гэдгийг тодотгон хэллээ.

Уулзалтын төгсгөлд, салбарын сайд нийтийн хэрэгцээний авто замд гамтай хандах үүднээс Монгол Улсад мөрдөгдөж буй стандарт шаардлагыг мөрдөж ажиллахыг чухалчлаад, 2025.04.14-нд буюу ирэх даваа гаригт шатахуун тээвэрлэх үйл ажиллагаа эрхэлдэг байгууллага, аж ахуй нэгж, компаниудын төлөөллийг хүлээн авч уулзахаа илэрхийллээ.

Мөн түлш тээврийн ачааны автомашинуудын тонн, жингийн үзүүлэлт, хил гаалиар орж ирдэг тээврийн хэрэгслийн стандарт үзүүлэлт зэргийг дахин судлах, зориулалтын цистерн автомашинуудыг түлш тээвэрт явуулах, тээвэрчдээс тавьсан албан шаардлага хүсэлтийн дагуу холбогдох ажлуудыг шат дараатай хийнэ.

Улсын ажлыг хэсэг бүлэг хүмүүсийн дураар хийхгүй. Нийтийн замыг улирлын онцлог, ачаа тээврийн даацаас шалтгаалан эвдээд байхыг зөвшөөрөхгүй. Гэсэн ч ачаа тээврийн жин тоннын асуудлыг жил бүр сөхөгддөг бус нэгдсэн шийдэлд хүргэж цэгцлэх, тээвэрлэлтийг цаашид ч 44 тонн гэсэн стандартын дагуу явуулах чиглэлд ЗТЯ бодлогоо чиглүүлнэ гэв