ЗТЯ-ны Төрийн нарийн бичгийн дарга С.Батболд өнөөдөр (2025.04.16) Бүгд Найрамдах Узбекистан улсын Хөрөнгө оруулалт, аж үйлдвэр, худалдааны дэд сайд Касымов Ильзат Аблахатовичийг хүлээн авч уулзлаа.

Талууд энэхүү уулзалтаар хоёр улсын дэд бүтэц, тээврийн салбар дахь хамтын ажиллагааг өргөжүүлэх,  дэд бүтэц, тээвэр, логистик, хөдөө аж ахуйн чиглэлд хамтран ажиллах тухай өргөн хүрээтэй санал солилцлоо.

ЗТЯ-ны Төрийн нарийн бичгийн дарга С.Батболд энэ үеэр Монгол Улсын Ерөнхийлөгч У.Хүрэлсүх Узкбекистан улсад айлчлах үеэр хэрэгжүүлэхээр төлөвлөсөн ажлуудын биелэлтэд анхаарч ажиллаж буйгаа хэлээд, үр дүнтэй, бодитой хэрэгжиж буй ажлуудаа танилцууллаа.

Тухайлбал, Зам, тээврийн сайдын тушаалаар Улаанбаатар-Ташкент-Улаанбаатар чиглэлд “Хүннү Эйр” ХХК-ийг, Улаанбаатар-Самарканд-Улаанбаатар чиглэлд “Изинис Эйрвэйз” ХХК-ийг сонгон зорчигч тээврийн хуваарьт нислэгийг төлөвлөөд ажиллаж байна. Мөн “МИАТ” ТӨХК-ийг Улаанбаатар-Ташкент-Улаанбаатар чиглэлд ачаа тээврийн нислэг үйлдэх агаарын тээвэрлэгчээр тус тус томилсоныг дуулгалаа.

 “Хүннү Эйр” ХХК нь Улаанбаатар-Ташкент-Улаанбаатар чиглэлд зорчигч тээврийн хуваарьт нислэгийг энэ оны 3 дугаар улиралд буюу 2025 оны 09 дүгээр сард эхлүүлэхээр бэлтгэл ханган ажиллаж байгааг хэллээ. Ачаа тээврийн нислэгийн тухайд “МИАТ” ТӨХК нь зах зээлийн судалгаа хийж байна гэв.

Тээвэрлэлтийг нэмэгдүүлэх ажлын хүрээнд Монгол-Узбекистаны хооронд автотээвэрлэлт хийх ажлыг БНХАУ-ын нутаг дэвсгэрээр дамжин зохион байгуулахаар төлөвлөөд ажиллаж байгаа тухай мэдээлэл солилцлоо.

Уулзалтын төгсгөлд талууд  хоёр орны хамтын ажиллагаа сүүлийн жилүүдэд эрчимжиж байгаад талархал илэрхийлээд Бүгд Найрамдах Узбекистан Улсын Ерөнхийлөгч Шавкат Миромонович Мирзиёев Монгол Улсад хийх төрийн айлчлалын үр дүнд хоёр улсын бүх салбарт олон чухал ажлууд бодитоор хэрэгжиж,  тэр дундаа тээврийн салбар дахь хамтын ажиллагаанд  олон ажил хэрэгч шийдвэрүүд гарна гэдэгт итгэлтэй байгаагаа хэлэв.