Төрийн соёрхолт, Монгол Улсын Соёлын гавьяат зүтгэлтэн, Онц бөгөөд бүрэн эрхт Элчин сайд Цэрэнпилийн Гомбосүрэн гуай өнөөдөр (2025.04.18) Зам, тээврийн яамны “Мэдээллийн цаг”-т зочноор уригдаж, төрийн алба хаагчидтай уулзаж туршлага мэдлэгээ хуваалцлаа.

Монголын нийгэм соёлын түүхэн дэх төрийн нэрт зүтгэлтэн, бүх цаг үеийн шилдэг сэхээтний нэг Цэрэнпилийн Гомбосүрэн гуай бол манай улсын хамгийн эгзэгтэй гэгдэх цаг үед буюу 1988-1996 оны үед Гадаад хэргийн сайдын албыг найман жил хашсан,  хэлэх үг,  хийсэн бүтээсэн зүйл арвинтай хүн билээ.  Тиймээс ажил мэргэжлийн онцлог, дэлхийн геополитикийн нөхцөл байдал, улс орны гадаад дотоод харилцаа зэрэг сонирхолтой сэдвээр түүх дурсамж хуваалцаж, нээлттэй сайхан ярилцлаа.  

Тэрээр 1967-1974 онд Улсын хэвлэлийн комбинатад технологич үйлдвэрийн хэлтсийн даргаар ажиллахаас эхлээд 1976-1982 онд БНМАУ-ын Гадаад  яаманд I хэлтсийн дарга, 1982-1984 БНМАУ-ын Гадаад харилцааны яаманд Орлогч сайд, 1984-1987 онд БНМАУ-аас ЗХУ-д суугаа ЭСЯ-ны Элчин зөвлөх, 1987-1988 онд МАХН-ын Төв Хорооны Гадаад харилцааны хэлтсийн орлогч эрхлэгч, 1988-1996 онд тодруулбал 1991 оноос БНМАУ-ын Гадаад яамны сайд, УИХ-ын гишүүний албаыг хашиж байсан юм.

Тиймээс энэ өдөр ажил мэргэжлийн онцлог, эзэмшсэн дадлага туршлагаа хуваалцахын зэрэгцээ төрийн албан хаагчдын сонирхсон асуултад хариулж, өөрийн амьдралын түүхийг өгүүлсөн дурсамж, баримт хоёрын дурьдатгал хосолсон номоо бэлэглэлээ.  

Монгол Улсын Соёлын гавьяат зүтгэлтэн, Онц бөгөөд бүрэн эрхт Элчин сайд Ц.Гомбосүрэн гуайн дурсамж ном хоёр дэвтэртэй.  Эхний номд тэрээр Москвагийн Хэвлэлийн дээд сургууль төгсөх хүртэлх үеэ багтаасан бол удаах дэвтэр нь

1. Ардын төрийн наран дор;
2. Нам, засгийн наран дор;
3. Шинэ цагийн наран дор,
4. Хүмүүн хорвоогийн наран дор хэмээх дөрвөн үндсэн бүлэгтэй. Энэхүү ном нь бүхэлдээ Ц.Гомбосүрэнгийн Гадаад хэргийн сайдын алба хашсан найман жилийн тухай дэлгэрэнгүй өгүүлсэн бөгөөд төрийн албаны залуу боловсон хүчин, гадаад харилцаа сонирхдог залууст туршлага мэдлэг болох чухал бүтээл ажээ.

Төгсгөлд нь дурдахад, энэхүү “Мэдээллийн цаг”-ийн уулзалт арга хэмжээ нь төрийн алба хаагчдын манлайллыг нэмэгдүүлж, мэдээллээр хангах, ажлын үр бүтээмжийг нэмэгдүүлэх, санал санаачлагыг дэмжих, туршлага солилцох зорилготой, 7 хоногт 1 удаа зохион байгууллагддаг үйл ажиллагаа юм.