Монгол Улсын урт хугацааны хөгжлийн бодлого “Алсын хараа-2050”, Хамтарсан Засгийн газрын 2024-2028 оны үйл ажиллагааны хөтөлбөр зэрэг бодлого төлөвлөлтийн бусад баримт бичигтэй уялдуулан зам, тээврийн салбар  дэд бүтэц, бүтээн байгуулалтын ажлаа эрчимжүүлж, олон жил гацсан томоохон төсөл хөтөлбөрүүдийг хөдөлгөж, хөгжлийг урагшлуулахад чиглэгдсэн дараах ажлуудыг хэрэгжүүлж байна.  

Юуны түрүүнд автотээврийн салбарт хийсэн онцлох таван ажлыг танилцуулж байна. 

• Олон улсын автотээврийн харилцааны тухай Монгол Улсын Засгийн газар, Туркменистан Улсын Засгийн газар хоорондын хэлэлцээрт 2024 оны 12 дугаар сарын 18-ны өдөр гарын үсэг зурлаа.

• Олон улсын автотээврийн харилцааны тухай Монгол Улсын Засгийн газар, Узбекстан Улсын Засгийн газар хоорондын хэлэлцээрт 2024 оны 06 дугаар сарын 24-ны өдөр гарын үсэг зурсныг Засгийн газрын 2024 оны есдүгээр сарын 18-ны өдрийн 83 дугаар тогтоолоор батлуулав.

• Улсын төсвийн 4.9 тэрбум төгрөгийн хөрөнгө оруулалтаар Орхон аймагт өдөрт 1600-1800, 1 цагт 120-160 зорчигчид үйлчлэх хүчин чадалтай зорчигч тээврийн автобуудлын барилгыг 2024 оны 08 дугаар сарын 28-ны өдөр ашиглалтад оруулж, иргэдийн тав тухтай, аюулгүй тээврээр үйлчлүүлэх боломжийг бүрдүүллээ. Тус автобуудлаар Хөвсгөл, Булган, Орхон аймгуудын хот хоорондын есөн чиглэлийн 100 гаруй тээврийн хэрэгсэл дайран өнгөрөх бөгөөд нийтийн зориулалтын талбай 7000м², үйлчилгээний автобусны зогсоолын талбай 300м², автобуудлын үйлчилгээний талбай 2480м² байна.

• Хот хоорондын нийтийн тээврийн үйлчилгээний чанар, хүртээмжийг сайжруулах ажлын хүрээнд нийтийн тээврийн үйлчилгээ эрхлэгч “Түмэнд нээлттэй хязгаарынхан” ХХК, “Ач буян трэвел” ХХК нар “Улаанбаатар хот – Увс аймгийн Улаангом сум” чиглэлд 28 хүний суудалтай, хөл амраагчтай, хагас унтлагын зориулалттай, 24 цагийн интернэт, VIP автобус үйлчилгээг эхлүүлэн ажиллаж байна.

• Иргэдийн зорчин явах тав тухтай байдал, эрэлт хэрэгцээг хангах ажлын хүрээнд улс, хот хоорондын нийтийн тээврийн 310, хотын доторх нийтийн тээврийн 600 автобусанд WIFI төхөөрөмж суурилуулан зорчигчид интернет сүлжээ ашиглах боломжийг бүрдүүлсэн.