Монгол Улсын Засгийн газрын гишүүн, Зам, тээврийн сайд Б.Дэлгэрсайхан Япон улсаас Монгол Улсад суугаа Онц бөгөөд Бүрэн эрхт Элчин сайд Мсарү Игавахара болон Япон Улсын Олон Улсын Хамтын Ажиллагааны Байгууллага "ЖАЙКА"-гийн Монгол дахь төлөөлөгчийн газрын дарга К.Мияаги, Япон Улсын “Ориентал Консалтантс Глобаль” компанийн төлөөлөл К.Такахаши нарыг хүлээн авч уулзлаа.

Уулзалтын эхэнд Зам, тээврийн сайд Б.Дэлгэрсайхан Япон Улсын Засгийн газар манай улсын эдийн засгийн хамтын ажиллагааг өргөжүүлэн хөгжүүлэхэд салбар бүрт чухал хувь нэмэр оруулж ирснийг онцлоод, энэ удаа хөнгөлөлттэй зээлийн нөхцөлөөр “Чингис хаан” Олон улсын нисэх онгоцны буудлыг өргөтгөх, хүчин чадлыг нэмэгдүүлэхээр хамтран ажиллаж буйд талархал илэрхийллээ.  

Мөн тэрээр Монгол Улсын агаарын тээврийн салбарт зорчигч тээврийн урсгал эрчимтэй нэмэгдэж, “Чингис хаан” нисэх онгоцны буудал ачаалал ихтэй ажиллаж байгааг дуулгаад, нисэх буудлыг өргөтгөх, хүчин чадлыг нэмэгдүүлэх ажлыг богино хугацаанд хэрэгжүүлэх, техник, эдийн засгийн үндэслэлийг боловсруулах, дэд бүтцийн өргөтгөх хүрээнд хийгдэж буй судалгааны ажлуудыг эрчимжүүлэх, бүтээн байгуулалтын барилгын ажлыг эрт эхлүүлэх шаардлагатай байгааг онцлон тэмдэглэлээ. 

"ЖАЙКА"-гийн Монгол дахь төлөөлөгчийн газрын дарга К.Мияаги, Япон Улсын “Ориентал Консалтантс Глобаль” компанийн төлөөлөл К.Такахаши нар судалгааны ажлын хүрээнд гаргасан урьдчилсан зураг төсөл, нисэх буудлын зүүн, баруун талыг өргөтгөх хэсэгчилсэн төлөвлөгөөг салбарын сайдад танилцуулж, зорчигч терминалыг шинээр барих эсвэл өргөтгөх, хөөрөх буух зурвасыг сунгах эсэх, зорчигч буух терминалыг сунгах тухай асуудлаар дэлгэрэнгүй санал солилцсон юм.

Уулзалтын төгсгөлд, Зам, тээврийн сайд Б.Дэлгэрсайхан нисэх буудлыг өргөтгөх төлөвлөгөө, суурь судалгааг танилцуулсанд талархал илэрхийлээд, нисэх буудлын ТЭЗҮ судалгааг Монгол Улсын хөгжил, хүн амын тооцоолол, зан заншил, нийслэл хотын түгжрэл зэрэг олон талын онцлог байдалтай нь уялдуулан 10-20 жилээр буюу 2050 он хүртэлх хугацаагаар төлөвлөх, мөн аялал жуулчлал хөгжихийн хэрээр олон улсаас Улаанбаатар хот болон орон нутаг руу чиглэх зорчигч, тээврийн урсгал улам нэмэгдэх хэтийн төлөвийг тусгаж ажиллах, хоёр талын саналыг нэгтгэж, барилгын ажлын гүйцэтгэлийг эрт эхэлж, ашиглалтыг мөн төлөвлөсөн хугацаанаасаа өмнө дуусгах байр суурьтай байгаагаа илэрхийллээ. 

Дээрх судалгааны хүрээнд ЗТЯ болон нисэхийн салбарын мэргэжилтнүүдийн зүгээс дэвшүүлж буй саналыг тусган ажиллах, дэд бүтэц зохион байгуулалтын хүрээнд үүсэж буй асуудлуудыг ЗТЯ-ны зүгээс шуурхай шийдвэрлэж, шаардлагатай зарим асуудлыг Засгийн газрын хуралдаанаар хэлэлцүүлж,  нягт хамтран ажиллах болно гэдгээ хэллээ. 

Япон улсаас Монгол Улсад суугаа Онц бөгөөд Бүрэн эрхт Элчин сайд Мсарү Игавахара тэргүүтэй төлөөлөгчдийг  ЗТЯ-нд хүрэлцэн ирж, ажил хэрэгч уулзалт өрнүүлсэнд талархал илэрхийллээ.