Монгол Улсын Засгийн газрын хэрэгжүүлэгч агентлаг-Төмөр замын газрын дарга Б.Артур тэргүүтэй албаны төлөөлөл БНХАУ-ын Улсын төмөр замын газрын дарга Фэй Дунбиньтэй уулзлаа. Уулзалтын үеэр талууд хоёр улсын төмөр замын салбарын хамтын ажиллагааг өргөжүүлж, цаашид хэрэгжүүлэх төмөр замын бүтээн байгуулалтын ажлыг урагшлуулахад дэмжлэг үзүүлж, хамтран ажиллах асуудлаар санал солилцож, нэгдсэн ойлголтод хүрлээ.

​Уулзалтын эхэнд Төмөр замын газрын дарга Б.Артур 2025 оны нэгдүгээр сарын 01-ний өдрөөс хүчин төгөлдөр хэрэгжиж эхэлсэн Төмөр замын тээврийн тухай хуулийн хүрээнд Төмөр замын салбарын тээврийн үйл ажиллагаатай холбоотой хяналт, зохицуулалтыг хэрэгжүүлэх чиг үүрэг бүхий Засгийн газрын хэрэгжүүлэгч шинэ агентлаг-Төмөр замын газар байгуулагдан, 2025 оны дөрөвдүгээр сараас үйл ажиллагаа явуулж эхэлсэн талаар танилцуулж, хоёр улсын ижил чиг үүргийн байгууллагуудын төлөөллүүдийн хувиар анх удаа уулзаж байгааг онцоллоо.

​БНХАУ-ын Улсын төмөр замын газрын дарга Фэй Дунбинь Монгол, Хятад хоёр орны хооронд олон жил яригдсан Гашуунсухайт-Ганцмод боомтын хил дамнасан төмөр замын бүтээн байгуулалтын асуудлаар хоёр улсын Засгийн газар, холбогдох байгууллага нэгдсэн тохиролцоонд хүрч, барилгын ажлын нээлтийг 2025 оны тавдугаар сарын 14-ний өдөр ёслол төгөлдөр зохион байгуулсан нь онцлон тэмдэглэх түүхэн чухал арга хэмжээ болсныг онцлон тэмдэглэв. Үргэлжлүүлэн Монгол, Хятадын төмөр замын салбарын хамтын ажиллагааг гүнзгийрүүлж, хоёр орны түвшинд хамтран байгуулах дараа дараагийн төмөр замын боомтуудын хэлэлцээг эрчимжүүлэн ахиулах үндэс суурийг тавьж, эдийн засгийн эргэлтийг хурдасгах нөхцөлийг бүрдүүлснийг дурдаж, энэ хүрээнд талуудын хооронд хийгдсэн тохиролцоог хоёр талаас тууштай хэрэгжүүлэн бодит ажил хэрэг болгохыг хүсэж байгааг илэрхийлэв.

Түүнчлэн Монгол Улсын Засгийн газрын бүрэлдэхүүнд төмөр замын асуудал дагнан хариуцсан төрийн байгууллага шинээр байгуулагдаж байгаа нь төмөр замын салбарын хөгжилд анхаарч буйн нэгэн илэрхийлэл бөгөөд цаашид хоёр улсын төмөр замын байгууллагын хамтын ажиллагааны хүрээнд тэргүүлэх ач холбогдол бүхий төсөл, хөтөлбөрүүдийг урагшлуулахад бүх талын дэмжлэг үзүүлэхэд бэлэн байгаагаа илэрхийллээ.

Талууд уулзалтаар Монгол, Хятадын төмөр замын салбарын хамтын ажиллагааны асуудлаар дэлгэрэнгүй санал солилцож, дараах тохиролцоонд хүрлээ. Үүнд:

Уулзалтын төгсгөлд талууд хоёр байгууллагын хамтын ажиллагааг тодорхойлсон, үр дүнтэй, ач холбогдолтой уулзалт болсныг тэмдэглэж, цаашид  дээрх тохиролцоог ажил хэрэг болгоход анхаарч ажиллахаа харилцан илэрхийлэв.

Энэ дашрамд дурдахад, Төмөр замын хамтын ажиллагааны байгууллагын гишүүн орнуудын зам тээврийн асуудал эрхэлсэн сайд нарын 52 дугаар чуулган энэ оны 06 дугаар сарын 10-13-ны өдрүүдэд БНХАУ-ын Чиндао хотноо зохион байгуулагдах бөгөөд талууд тус арга хэмжээний үеэр дахин уулзаж, бүс нутгийн хамтын ажиллагааны хүрээний бусад асуудлыг хэлэлцэнэ.