Монгол Улсын урт хугацааны хөгжлийн бодлого “Алсын хараа-2050”, Хамтарсан Засгийн газрын 2024-2028 оны үйл ажиллагааны хөтөлбөр зэрэг бодлого төлөвлөлтийн бусад баримт бичигтэй уялдуулан зам, тээврийн салбар  дэд бүтэц, бүтээн байгуулалтын ажлаа эрчимжүүлж, олон жил гацсан томоохон төсөл хөтөлбөрүүдийг хөдөлгөж, хөгжлийг урагшлуулахад чиглэгдсэн дараах ажлуудыг хэрэгжүүлж байна.  

Энэ удаад далайн захиргааны салбарт хийсэн онцлох таван ажлыг онцолж байна.

• СУДАЛГААНЫ ХӨЛӨГ ОНГОЦНЫ ТӨСӨЛ ХЭРЭГЖҮҮЛЖ ЭХЭЛЛЭЭ

Олон улсын Далайн байгууллагын дэмжлэгтэйгээр Монгол Улсад судалгааны хөлөг онгоц авах, сургалт, судалгаа хийх төслийн санхүүжилт батлагдаж, төслийг хэрэгжүүлж эхлээд байна.

Төслийн хүрээнд Хөвсгөл нуурын гүн, ёроолын тогтоц, усны гүн, навигацийн нөхцлийг судалж, навигацийн зураглал, усан замын тэмдэг тэмдэглэгээтэй мэдээллийн сантай болох зорилготой бөгөөд байгаль орчинд ээлтэй усан замын тээврийг хөгжүүлэх үндэс суурь тавигдах юм.

• ОЛОН УЛСЫН ДАЛАЙН БАЙГУУЛЛАГЫН СУРГАЛТЫГ МОНГОЛДОО ЗОХИОН БАЙГУУЛЛАА

Монгол Улсын Далайн захиргаа нь Олон улсын Далайн байгууллагын Техник хамтын ажиллагааны хэлтэстэй хамтран “Далбааны Эзэн Улсын Хөлөг Онгоцны Бүртгэл, Хяналт, Эрх үүргийн Хэрэгжилт” сэдэвт сургалтыг 2024 оны 12 дугаар сарын 02-06-ны өдрүүдэд Улаанбаатар хотноо зохион байгууллаа.

Сургалтад Олон улсын Далайн байгууллагын мэргэшсэн зөвлөх, төрийн байгууллагын холбогдох албан тушаалтнууд оролцож олон улсын конвенцүүдийн хэрэгжилтийн талаар цогц мэдлэг, ур чадварыг эзэмшсэн.

Тус сургалт нь сүүлийн 10 жилд Монгол Улсад зохион байгуулагдаагүй, чухал ач холбогдолтой арга хэмжээ болсон.

• ГОВЬСҮМБЭР АЙМАГТ ХУУРАЙ БООМТ БАЙГУУЛАХ ЗАСГИЙН ГАЗРЫН ТОГТООЛЫГ ХЭЛЭЛЦҮҮЛСЭН

Монгол Улсын Далайн захиргаанаас Говьсүмбэр аймгийн төв Чойр хотыг түшиглэн уул уурхайн экспортын бүтээгдэхүүнээр төрөлжсөн “Хуурай боомт” байгуулах эдийн засгийн үндэслэл, хэрэгцээ шаардлагыг боловсруулж, Говийн бүсийн анхдугаар зөвлөгөөнөөр хэлэлцүүлэн холбогдох шийдвэрийг гаргууллаа.

Түүнчлэн НҮБ-ын Ази, Номхон далайн эдийн засаг, нийгмийн комиссоос хоёр жил тутам зохион байгуулдаг ажлын хэсгийн хуралдаанд Монгол Улсын хуурай боомтын жагсаалтад Чойр боомтыг нэмж тусгуулахаар бэлтгэл ажлыг ханган ажиллаж байна.

Ингэснээр Монгол Улсын уул уурхайн бүтээгдэхүүнийг Чойр өртөөнөөс Замын-Үүд “Бүс нутгийн логистикийн төв” хуурай боомтоор дамжуулан БНХАУ-ын Эрээн хилийн боомт болон Жинжоу далайн боомт хүртэл тээвэрлэх боломж нэмэгдэх юм.

• ӨГИЙНУУРТ УСАН ЗАМЫН ХЯНАЛТЫН ПОСТ БАЙГУУЛЖ БАЙНА

Архангай аймгийн Өгийнуурын эрэгт усан замын тээврийн “Хяналтын пост” байгуулах ажлыг Монгол Улсын Далайн захиргаанаас үе шаттайгаар хэрэгжүүлж байна.

• 2024 онд уг постыг эрчим хүчний эх үүсвэрт холбох цахилгааны шугам татаж, дэд өртөөг суурилуулсан.
• 2025 онд гүний худаг гаргах, гадна хашаа, хяналтын байр барих тендер сонгон шалгаруулалтыг амжилттай зохион байгуулж, гэрээг байгуулаад байна.