Салбарын хяналт шалгалтын талаар ЗТЯ-ны Салбарын хяналтын газрын дарга М.Энхболд дараах мэдээллийг өглөө.

Зам, тээврийн сайдын 2025 оны 01 дүгээр сарын 09-ний тушаалын дагуу хилийн боомтуудад үйл ажиллагаа явуулж буй ААН байгууллагууд, тээврийн хэрэгсэл, жолооч нарын дунд салбарын хяналт шалгалтыг хийлээ.

Тодруулбал “Автотээврийн үндэсний төв” ТӨҮГ-ын Автотээврийн хяналтын улсын байцаагч нар болон байгууллага, ААН-ийн төлөөллөөс бүрдсэн хяналт шалгалтыг 2025.04.21-05.26-ны өдрүүдэд Монгол улс, БНХАУ-ын хилийн автотээврийн нийт 9 боомт тус бүрээр улс хоорондын байнгын ачаа тээвэрлэлтийн үйл ажиллагаа эрхлэж буй 638 аж ахуйн нэгж болон 17551 мэргэшсэн жолоочтой эсэх, 25705 тээврийн хэрэгслийн техникийн бүрэн бүтэн байдалд төлөвлөгөөт бус хяналт шалгалт хийж ажиллалаа.

Давхардсан тоогоор /Нэг ААН 2 боомтод зэрэг үйл ажиллагаа явуулж байгаа/ шалгалтад хамрагдсан 638 аж ахуйн нэгжээс 281 ААН нь их эрсдэлтэй, 257 ААН нь дунд эрсдэлтэй, 82 ААН нь бага эрсдэлтэй үнэлэгдсэн.

Аж ахуйн нэгж, жолооч нараас ирүүлсэн санал, хүсэлтийг үндэслэн “Ачаа тээвэрлэлтийн аюулгүй байдлыг шалгах хяналтын хуудас”-нд байгаа зарим заалтуудад өөрчлөлт шинэчлэлт хийх түр зохицуулалтыг хийж ажиллаж байна.