Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.05.29) БНХАУ-ын “CRRC Qiqihar” буюу “Цицихар” галт тэрэгний үйлдвэрлэлийн компанийн төлөөлөгчдыг хүлээн авч уулзлаа.

Уулзалтаар талууд Хятадад технологийн шинэчлэлийг төмөр замын вагон үйлдвэрлэлээр олон жил тэргүүлж ирсэн “Цицихар” компанитай хамтран ажиллах тухай санал солилцлоо. Тэр дундаа тусгай зориулалтын вагон худалдан авах, тус байгууллагаас бүтээгдэхүүн үйлчилгээг худалдан авч буй Монгол Улсын ААН, компаниуд, бизнес эрхлэгч нарт зориулсан зээлийн үйлчилгээг нэвтрүүлэх, галт тэрэгний засвар үйлчилгээний төв байгуулах, сэлбэг хэрэгсэл нийлүүлэх тухай боломжуудын талаар хэлэлцлээ.

Уулзалтад “Цицихар” компанийн ТУЗ-ын дарга Ю Вэй, тус компанийн нэгдүгээр орлогч дарга Чжу Юнхой, Маркетинг экспортын албаны менежер Би Цзицзян нар оролцлоо.

БНХАУ-ын “CRRC Qiqihar” буюу “Цицихар” галт тэрэгний үйлдвэрлэлийн компани нь задгай вагон, битүү вагон, хавтгай вагон, бункер вагон, тусгай зориулалтын вагон, том оврын вагон, төмөр замын кран, сэлбэг хэрэгсэл гэх мэт 300 гаруй төрлийн бүтээгдэхүүн үйлдвэрлэдэг үндэсний, өндөр түвшний технологийн компани юм.

”CRRC Qiqihar” нь Хятад улсын дотоодын зах зээлийг хангаад зогсохгүй гадаадад өндөр хөгжилтэй орнуудад бүтээгдэхүүнээ экспортолдог бөгөөд одоогоор Австрали, Шинэ Зеланд, АНУ, Өмнөд Солонгос, Бразил, Монгол, Казахстан, Нигери зэрэг дэлхийн 30 гаруй улс оронд ачааны вагон экспортолжээ.

Зам, тээврийн сайд Б.Дэлгэрсайхан хэлэхдээ “Монгол Улсын хөдлөх бүрэлдэхүүний дийлэнх хувийг ОХУ-д үйлдвэрлэсэн хөдлөх бүрэлдэхүүн эзэлдэг бөгөөд эдгээр хөдлөх бүрэлдэхүүнүүд нь ОХУ-д үйлдвэрлэсэн “СА-3” авто угсраатай байдаг. Энэхүү “СА-3” авто угсрааг БНХАУ-д үйлдвэрлэдэг өөрөө хөмрөгч авто угсраа болгон өөрчлөж, ашиглах шаардлагатай байгаа тул энэ чиглэлээр хийгдсэн судалгаа, тооцоолол байгаа бол туршлага солилцож, вагонуудын авто угсрааг өөрчлөн тоноглох ажилд хамтран ажиллахыг хүссэн юм.

Мөн 2025.05.14-нд Гашуунсухайт-Ганцмод чиглэлийн төмөр замын барилгын ажлын нээлтийг албан ёсоор хийснийг дурдаад төслийг хэрэгжүүлж дуусахад уг төмөр замд өөрөө хөмрөгч авто угсраатай вагонуудыг ашиглахаар Хятадын талтай тохиролцсоныг онцоллоо. Иймд ачааны вагон үйлдвэрлэх нийлүүлэх, засвар үйлчилгээг Монголд хийх тухай саналыг бас дэвшүүлэн тавив. Уулзалтын төгсгөлд "Цицихар" компанийн удирдлагууд энэхүү саналыг судалж үзээд, хэрэгжүүлэх чиглэлд хамтран ажиллахаа илэрхийллээ.