Монгол Улсад Нисэх хүчин үүсэж хөгжсөний 100 жилийн ойн баярын хуралд Монгол Улсын Ерөнхийлөгч У.Хүрэлсүхийн илгээлтийг Ерөнхийлөгчийн Тамгын газрын дарга Г.Занданшатар уншиж танилцуулан шагналын хамт гардуулан өглөө.

Монгол Улсын Ерөнхийлөгчийн илгээлтийг бүрэн эхээр нь нийтэлж байна.

МОНГОЛ УЛСЫН ЕРӨНХИЙЛӨГЧ УХНААГИЙН ХҮРЭЛСҮХИЙН ИЛГЭЭЛТ

Эрхэм хүндэт иргэний нисэх, нисэх хүчний ахмадууд, үе үеийн төлөөлөл, албан хаагчид, зочид төлөөлөгчид өө!

Та бүхэнд эх орны тусгаар тогтнол, хөгжил, дэвшил, аюулгүй байдлын чухал тулгуур нисэх хүчний түүхт 100 жилийн ойн халуун баярын мэндийг омогшил бахархал, хүндэтгэлтэйгээр өргөн дэвшүүлье.

Тэртээх 1925 оны 05 дугаар сарын 25-ны өдөр Монголын хөх тэнгэрт “Ю-13” онгоц дүүлэн нисэж нисэх хүчний түүх эхэлсэн бол үе үеийн нисгэгч, инженер техникийн ажилтнууд, цэргийн алба хаагчид, иргэний нисэхийн зүтгэлтнүүдийн хүчин чармайлт, нөр их хөдөлмөр, зүтгэлийн үр дүнд өдгөө энэ салбар маань нэгэн зууныг туулж, дараагийн хөгжлийн зууныг эхлүүлж байна.

Өргөн уудам нутаг дэвсгэртэй, хүн амын суурьшил сийрэг, далайд гарцгүй манай орны хувьд иргэний нисэхийн салбар нь гадаад ертөнцөд гарах гол гарц болж, улс орны эдийн засаг, худалдаа, аялал жуулчлал, гадаад харилцаа, бүс нутгийн хөгжлийг тодорхойлогч стратегийн тэргүүлэгч салбар болон хөгжөөд байна.

Монголчууд бид газар зүйн байршлын давуу талаа ашиглан даяарчлагдсан иргэний агаарын тээврийн нэгэн бүрдэл болон агаарын харилцааг өргөжүүлж, Монгол улс олон улсын зорчигч болон ачаа тээврийн бүс нутгийн хэмжээний зангилаа болж, дэлхийд тэргүүлэгч хүчирхэг агаарын тээврийн салбартай болох эхлэл энэ мөчөөс эхэлж байна.

Монголын тэнгэрийн энхийн сахиул цэргийн нисэх хүчин маань Монгол Улсын зэвсэгт хүчний бүрэлдэхүүнд багтаж, агаарын хил хязгаарыг сахин хамгаалах, онцгой нөхцөл байдал, гамшиг ослын үед эрэл хайгуул, аврах ажиллагаа явуулах, батлан хамгаалах чадавхыг дээшлүүлэхэд үнэтэй хувь нэмэр оруулсаар ирсэн. Баатарлаг дайчин замналтай Монгол Улсын нисэх хүчин эх орноо батлан хамгаалах, ард түмэндээ үйлчлэх эрхэм үүргээ нэр төртэй биелүүлэн, гавьяаны алтан хуудсаар түүхээ улам баяжуулна гэдэгт итгэл төгс байна.

Өнөөдөр та бүхэн минь өнгөрсөн зууны бахархам түүхээ дурсахын зэрэгцээ ирэх зууны хөгжлийн чиг хандлагаа тодорхойлж, Монгол Улсынхаа батлан хамгаалах эрх ашигт тулгуурласан, аюулгүй байдлын орчин, эдийн засгийн бодит чадавхад нийцсэн үйл ажиллагаа явуулах, өмнөх амжилтуудаа бататгах, орчин үеийн шинжлэх ухаанч санал, санаачилгыг ажил хэрэг болгох зайлшгүй шаардлага үүсэж байна. Та бүхнийг шинэ зууны олон олон боломж, ололт амжилт, сорилт, хариуцлага хүлээж байна.

Монгол Улсын нисэх хүчнийг үүсгэн байгуулагч, хөгжүүлэн бэхжүүлэгч үе үеийн алба хаагчид, инженер, техникчид, тэдний гэр бүл, үр хүүхдүүдэд талархал илэрхийлье.

Та бүхний бахархалт замнал, амжилт бүтээл хойч үеийнхэнд маань урам зориг, үлгэр дуурайлал болсоор байх болно.

Төр засгийн зүгээс нисэхийн салбарын үндсэн үйл ажиллагаа, бие бүрэлдэхүүний үүрэг гүйцэтгэх чадавх, техник технологийн шинэчлэлт, ахуй нөхцөлийг сайжруулахад онцгойлон анхаарч бүх талаар дэмжин ажиллах болно.

Монголын Нисэх хүчний яруу алдар бадартугай.

Мөнх тэнгэрийн хүчин дор Монгол улс мандан бадрах болтугай!