Монгол Улсад Нисэх хүчин үүсэж хөгжсөний түүхт 100 жилийн ойн баярын хуралд Монгол Улсын Засгийн газрын гишүүн, Зам, тээврийн сайд Б.Дэлгэрсайхан мэндчилгээ дэвшүүлж үг хэллээ. Зам, тээврийн сайдын мэндчилгээг бүрэн эхээр нь хүргэж байна.

УГ МЭНДЧИЛГЭЭНД:

Эрхэм хүндэт Монгол Улсын Ерөнхийлөгчийн Тамгын газрын дарга Г.Занданшатар танаа

Эрхэм хүндэт Монгол Улсын Засгийн газрын гишүүд ээ

Эрхэм хүндэт зочид төлөөлөгчид өө

Эрхэм хүндэт нисэхийн салбарын удирдлага, хамт олон, ахмадууд та бүхэндээ

Монгол Улсад Нисэх хүчин үүсэж хөгжсөний түүхт 100 жилийн ойн баярын мэндийг Зам, тээврийн яамны нэрийн өмнөөс болон хувиасаа өргөн дэвшүүлье!

Монголын тэнгэрт 1925 оны 05 дугаар сарын 25-ны өдөр “Ю-13” онгоц дүүлэн ниссэнээр түүхээ эхлүүлсэн иргэний нисэхийн салбар үе үеийн нисгэгч, инженер техникийн ажилтнууд, бүх шатны ажилтан алба хаагчдын хүчин чармайлт, нөр их хөдөлмөр, зүтгэлийн үр дүнд нэгэн зууныг туулж, өдгөө бүс нутгийн хэмжээнд төдийгүй дэлхийд хүлээн зөвшөөрөгдөхүйц аюулгүй, найдвартай, өрсөлдөх чадвартай болж, дараагийн хөгжлийн шинэ зууныг эхлүүлж байна.

Иргэний нисэхийн салбар нь Монгол Улсыг дэлхийн улс орнуудтай холбох гүүр болохын зэрэгцээ гадаад худалдаа, эдийн засаг, аялал жуулчлалыг хөгжүүлэх чухал хөшүүрэг болон улс орны хөгжилд онцгой хувь нэмэр оруулсаар, олон арван ололт амжилтыг бүтээсээр байна.

Энэхүү түүхт ойн баяраар бид өнгөрсөн зууны ололт амжилтаа дүгнэж, шинэ зууны хөгжлийн чиг хандлага, зорилгоо тодорхойлох чухал цаг үеийг хамтдаа тэмдэглэж байна.

Түүх сөхвөл бидэнд бахархах олон амжилт бий. Өнгөрсөн 2024 онд бид агаарын тээвэрт 2.2 сая зорчигч тээвэрлэж, олон улсын зорчигчдын тоо өмнөх оноос 33 хувь буюу 434 мянган зорчигчоор өссөн нь энэхүү амжилтын бодит илэрхийлэл юм.

Монгол Улсын Засгийн газраас баримталж буй агаарын тээврийг либералчлах бодлогын хүрээнд бид дэлхийн 48 улстай агаарын харилцааны хэлэлцээрийг байгуулж, шинээр 11 нислэгийн чиглэл нээж, дэлхийн 22 улсын 60 гаруй хот руу нислэг үйлдэж байна.

Тухайлбал, Олон улсын нислэгүүдээс дурдвал, АНУ болон Франкфурт, Истанбул, Красноярск, Алматы, Токио, Сөүл, Инчеон, Бусан, Чонжү, Тэгү, Бээжин, Шанхай, ХонгКонг, Фукуок, Бангкок, Хошимин, Эрхүү, Ордос, Гуанжоу, Эрээн, Манжуур, Хайлаар, Хөх хот Хайнан, Саньяа, Хөлөнбуйр, Манжуур зэрэг хотууд руу захиалгат болон хуваарьт нислэгийг үйлдэж байна. Ирэх есдүгээр сард Улаанбаатар -Москва чиглэлд шууд нислэг үйлдэхээр төлөвлөж байна.

Мөн агаарын зайг шинэчилж, навигацийн үйлчилгээний үнэлгээг 7 жилийн дараа нэмэгдүүллээ.

Агаарын хөлгийн парк шинэчлэлтийг хийж, Монгол Улсад болон гадаад улс орнуудад бүртгэлтэй нийт 63 агаарын хөлөгтэй болсон байна.

Иргэний нисэхийн тухай хуулийг шинэчлэн эрх зүйн зохицуулалтыг нь илүү сайжруулж, олон улсын жишигт нийцсэн салбарын бүтцийн өөрчлөлтийг хэрэгжүүлж байна.

Дотооддоо орон нутгийн нислэгийг сэргээж, алслагдсан аймгийн иргэдийг хямд тарифаар зорчих боломжийг бүрдүүллээ.

Нисэхийн аюулгүйн үйлчилгээний хувьд АНУ-ын Тээврийн аюулгүй байдлын захиргаа (TSA)-наас шат дараатай зохион байгуулж буй олон улсын хяналт, шалгалтад амжилттай хамрагдаж, Монгол Улсын нисэхийн аюулгүйн хамгаалалт олон улсын шаардлагыг бүрэн хангасан, амжилттай үнэлгээг авсныг энд онцлон дурдахад таатай байна.

Үүний үр дүнд Америкийн “United Airlines” компанийн нислэгийг 2025 оны 5 дугаар сарын 01-ний өдрөөс эх орондоо амжилттайгаар хүлээн авч, Монгол Улсын агаарын тээврийн салбарт түүхэн шинэ хуудсыг нээгээд байна.

Энэ бүх ололт амжилтууд нисэхийн салбартай зүрх сэтгэлээ холбосон үе үеийн нисгэгчид, бүх шатны ажилтан алба хаагч та бүхний хичээл зүтгэлийн үр дүн гэдгийг онцлон тэмдэглэе.

Мөн нисэхийн салбарт онцлон дурдаж буй энэ амжилт бүтээлийн ард Монгол Улсын төр, засгаас баримталж буй тогтвортой, урагш тэмүүлсэн бодлого, эрх зүйн шинэчлэл, бүтцийн өөрчлөлтүүд бидэнд хөгжлийг түүчээлэх том боломжийг олгож буйд талархал илэрхийлье.

Цаашид бид агаарын тээврийн либералчлалыг үргэлжлүүлж, орон нутгийн нисэх буудлын хүчин чадал, ашиглалтыг сайжруулан аялал жуулчлалыг хөгжүүлэх, иргэний нисэхийн үйлчилгээнд орчин үеийн дэвшилтэт техник технологийг нэвтрүүлэн чанар хүртээмжийг нэмэгдүүлэх, олон улс, орон нутгийг нислэгийг эрчимжүүлэх, “Чингис хаан” олон улсын нисэх буудлыг бүс нутгийн транзит тээврийн зангилаа төв болгох замаар Монгол Улсын эдийн засгийн өсөлтийг хангахад иргэний нисэхийн салбарын оролцоог нэмэгдүүлнэ.

Мөн байгальд ээлтэй нисэхийн үйл ажиллагааг хөгжүүлэх, мэргэжилтэй боловсон хүчнийг бэлтгэхэд онцгой анхаарч ажиллах болно.

Монголын иргэний нисэхийн салбар цаашид ч улам ихийг хийж бүтээж, уулс давж, улс орныг холбосон стратегийн гүүр болсоор байх болтугай!