Монгол Улсад Нисэх хүчин үүсэж хөгжсөний 100 жилийн ойг тохиолдуулан өнөөдөр (2025.05.23) "Монгол ард эскадрилийн дурсгалын хөшөө"-нд Зам, тээврийн сайд Б.Дэлгэрсайхан, Батлан хамгаалын сайд С.Бямбацогт, ЗХЖШ-ын дарга, хошууч генерал С.Ганбямба болон ОХУ-аас Монгол улсад суугаа цэргийн аташей хошууч генерал П.В.Петрунин, Иргэний нисэхийн ерөнхий газрын дарга Э.Төрбаяр, БЗД-ийн Засаг дарга Г.Жаргалсайхан болон Иргэний нисэхийн Үндэсний төв, “МИАТ” ТӨХК-ний захирлууд, ахмад дайчдын төлөөлөл цэцэг өргөж хүндэтгэл үзүүллээ.

Монгол Улсад 1925 оны тавдугаар сарын 25-нд Улаанбаатар хотын Консулын дэнжид Ю-13 онгоц бууснаар Нисэх хүчин байгуулагдсан түүхтэй.

Монголд анх удаа нисэх онгоц буусан газрын талбай дээр сүндэрлэн баригдсан тэнгэр өөд тэмүүлж буй гурван онгоц бүхий хөшөөг 1985 онд Оросын уран барималч Л.К.Медяновын зураг төслөөр байгуулж байжээ.

Түүхийн сөхвөл:

Монголд анх удаа нисэх онгоц буусан газрын талбай дээр сүндэрлэн баригдсан тэнгэр өөд тэмүүлж буй гурван онгоц бүхий хөшөөг 1985 онд Оросын уран барималч Л.К.Медяновын зураг төслөөр байгуулсан түүхтэй.

Бидний мэдэх “гурван онгоц”-той хөшөө сүндэрлэсэн энэ газарт анх 1925 оны 5 дугаар сарын 25-нд Монголын нисэх хүчний анхны онгоц болох “Ю-13”-ыг Зөвлөлтийн нисгэгч А.А.Лапин жолоодон ирж энд газардаж байжээ.

Эх орны дайны хүнд үе буюу 1943 онд Монголын ард түмний хуримтлуулсан хөрөнгөөр Зөвлөлтийн Улаан армид нисэх онгоцны “Монгол ард” эскадрил буюу “Ла-5” загварын байлдааны 12 онгоц бэлэглэж байсан түүхэн үйл явдлыг гэрчлэн мөнхөлсөн байна.