Монгол Улсад Нисэх хүчин үүсэж хөгжсөний түүхт 100 жилийн ой болон Монголын иргэний агаарын тээврийн "МИАТ" ТӨХК-ийн 69 жилийн ой энэ өдрүүдэд тохиож байна.

Үүнтэй холбогдуулан "МИАТ" ТӨХК-ийн зүгээс иргэний агаарын тээврийн салбарын үе үеийн төлөөлөлдөө зориулж, хүндэтгэлийн арга хэмжээг зохион байгууллаа. Уг арга хэмжээнд Зам, тээврийн сайд Б.Дэлгэрсайхан, "МИАТ" ТӨХК-ийн Гүйцэтгэх захирал Б.Мөнхтамир тэргүүтэй иргэний агаарын тээврийн үе үеийн төлөөллүүд оролцов.

Арга хэмжээг нээж, Зам, тээврийн сайд Б.Дэлгэрсайхан үг хэлэхдээ "Монголын иргэний агаарын тээврийн салбарт либералчлал эрчимтэй хийгдэж, энэ зах зээлд одоогоор дотоодын 4, гадаадын 16 компани үйл ажиллагаа явуулж байна. Дэлхийн хамгийн том агаарын тээврийн компаниудын нэг болох "United airlines" Монгол Улс руу үйлдмэн анхны нислэг тавдугаар сарын 1-нд боллоо.

Мөн энэ онд гадаадын хоёр агаарын тээвэрлэгч компани Монгол Улс руу нислэг үйлдэх болсныг дуулгахад таатай байна. Ингэснээр манай улсын агаарын тээврийн зах зээлд гадаадын 19 компани 22 чиглэлд шууд нислэг үйлдэн, үйл ажиллагаа явуулахаар боллоо" хэмээн онцлов.

Үргэлжлүүлэн "МИАТ" ТӨХК-ийн Гүйцэтгэх захирал Б.Мөнхтамир ярихдаа "Манай компани 69 жилийнхээ ойг түүхэн амжилтаар угтлаа. Бид энэхүү 69 жилийн хугацаанд нийт 512 мянган аяллаар 570 сая км агаарын зам туулж, нийт 25 сая зорчигч тээвэрлэсэн байна. Мөн 2024 онд өмнөх жилүүдийн амжилтаа шинэчилж, салбарынхаа 100 жилийн ойг угтаж байгаагаараа онцлог юм" гэлээ.