Монгол Улсад Замын хөдөлгөөний дүрэм батлагдаж хэрэгжсэний 100 жилийн түүхт ойд зориулсан эрдэм шинжилгээний хурал зохион байгуулагдлаа.

Хурлыг нээж, Зам, тээврийн сайд Б.Дэлгэрсайхан хэлэхдээ “Замын хөдөлгөөний дүрэм нь хамгийн түгээмэл, даяарчлагдсан эрх зүйн хэм хэмжээ бөгөөд дэлхий нийтэд замын хөдөлгөөнд оролцох нэгдсэн нэг зарчим, бодлого үйлчилж байна. НҮБ-ын Ерөнхий ассамблейгаас тогтоол батлан зам тээврийн ослоор нас барсан болон гэмтсэн хүний тоог тус бүр 50 хувь бууруулах зорилт дэвшүүлээд байна. Гадаад, дотоодын эрдэмтэд судлаачдын үзэж байгаагаар хамгаалах малгай, бүс бүх нийтээр хэрэглээд, жолооч нар согтууруулах ундаа, мансууруулах бодис хэрэглэхээс татгалзаж, тээврийн хэрэгслийн хурдыг тогтоосон хэмжээнээс хэтрүүлэхгүй бол Монгол Улс нас баралт, гэмтлийг 50 хувь бууруулах боломжтой гэж тооцоолжээ.

Зам тээврийн осол нь урьдчилан сэргийлэх боломжтой, осол гарахад нөлөөлдөг эрсдэлт хүчин зүйл нь тодорхой байдаг тул өндөр хөгжилтэй улс оронд хэрэглэж байгаа тэргүүн туршлагаас судлан, олон улсын хөгжлийн чиг хандлага, үүсч буй шинэ нөхцөл байдалтай уялдуулан цаашдын чиг хандлагыг тодорхойлоход энэхүү эрдэм шинжилгээний хурал ихээхэн ач холбогдолтой гэж үзэж байна” хэмээн онцоллоо.

Монгол Улсын хэмжээнд сүүлийн 5 жилд 124,583 зам тээврийн осол бүртгэгдэж, 43,5 тэрбум төгрөгийн хохирол учирч, ослын улмаас 2534 хүн нас барж, 14,905 хүн гэмтсэн бөгөөд эдгээрээс 312 хүүхэд амь насаа алдаж, 3861 хүүхэд гэмтсэн нь анхаарал хандуулах асуудлын нэг болж байна.

Иргэдийн санал асуулгаар Улаанбаатар хотын замын хөдөлгөөний саатал, түгжрэл иргэдийн бухимдлыг дээд зэргээр үүсгэж байгаа бөгөөд Азийн хөгжлийн банк, Бүс нутгийн олон улсын байгууллагын судалгаагаар Замын хөдөлгөөний аюулгүй байдлын таатай бус нөхцөлтэй гэж үнэлэгдсэн байна.

Иймд замын хөдөлгөөний аюулгүй байдлыг хангах үйл ажиллагааны төлөвлөгөөг хот, суурин газрын ерөнхий төлөвлөгөө, авто замын мастер төлөвлөгөө, осол гэмтлээс сэргийлэх төлөвлөгөө, гэмт хэрэг, зөрчлөөс урьдчилан сэргийлэхээр хэрэгжүүлж буй бусад хөтөлбөр болон автотээвэр, авто замын чиглэлээр хэрэгжиж байгаа төсөл, хөтөлбөртэй уялдуулан хэрэгжүүлэх зайлшгүй шаардлагатай байгааг мэргэжилтнүүд хэлж байна.