Монгол Улсын Засгийн газрын гишүүн, Зам, тээврийн сайд Б.Дэлгэрсайхан Бүгд Найрамдах Турк Улсын “Vapi Markezi” компанийн төлөөлөгчдийг хүлээн авч уулзлаа.

Уулзалтаар талууд зам, тээврийн салбарын бүтээн байгуулалт, тэр дундаа нийслэл хотын тулгамдсан асуудал, хэт төвлөрөл, түгжрэлийг шийдэхийн тулд нийтийн тээвэрт хөнгөн галт тэрэг буюу LRT-ийг нэвтрүүлэхээр төлөвлөж байгаа талаар дэлгэрэнгүй санал солилцлоо.

Мөн Улаанбаатар хотын төвлөрлийг сааруулах, түгжрэлийг бууруулах ажлын хүрээнд олон улсын туршлага, дэвшилтэт технологиудыг нэвтрүүлж буй туршлагаас хуваалцах, ингэхдээ БНТУ-ын “Vapi Markezi” компанийн шилдэг туршлагууд, гадаадын улс орнуудад хийсэн ажлууд, хэрэгжүүлсэн томоохон төслүүдтэй танилцаж, мэдээлэл солилцлоо.

“Япи Меркези” групп компани нь Турк улсын нийтийн тээвэрт томоохон төслүүдийг амжилттай хэрэгжүүлсэн олон жилийн туршлагатай компани бөгөөд дэлхийн олон улс оронд хурдны төмөр зам, метро, гүүрэн байгууламжийг амжилттай барьж гүйцэтгэсэн ТОП компаниудын нэг юм. Тухайлбал, тус компанийн инженер техникийн ажилтнууд Судан дахь бүтээн байгуулалтын том гүүрнүүд, Мороко дахь Касабланкагийн трамвай, Алжир дахь төмөр зам, Катар дахь Доха метро зэрэг олон том төслүүдийг амжилттай хийж гүйцэтгэжээ.

Зам, тээврийн сайд Б.Дэлгэрсайхан “Япи Меркези” групп компанийн зочид төлөөлөгчидтэй уулзсандаа баяртай байгаагаа илэрхийлээд, Улаанбаатар хотод хэрэгжүүлэх мега төслүүд, ЗТЯ-ны зүгээс тээврийн салбарт хийх ажлуудын талаар танилцуулаад, хамтран ажиллах боломжуудын талаар хэлэлцэв.