Зам тээврийн салбарын залуучуудын 2-р чуулган зохион байгуулагдлаа. Зам тээврийн салбарын залуучуудыг хөгжүүлэх, салбарын хөгжлийн бодлогод залуучуудын оролцоог нэмэгдүүлэх, тэдний бүтээлч сэтгэлгээг дэмжих замаар байгууллагын хөгжлийг түүчээлэхэд дэмжлэг үзүүлэх, тэднийг эвлэлдэн нэгдэх, хөгжүүлэх зорилготой тус чуулганд салбарын 170 орчим залуус оролцож, өөрсдийн үзэл бодлоо илэрхийллээ.

Чуулганыг нээж, Зам, тээврийн сайд Б.Дэлгэрсайхан үг хэлэхдээ Ази, Европын улс орнуудад тээврийн салбарын хөгжил эрчимтэй хөгжиж буйг онцлоод, тэр дундаа агаарын тээвэр, автозамын хөгжлийн чиг хандлагад технологийн хөгжил, ухаалан тээврийн систем нэвтэрсэн нь Монгол Улсын зам тээврийн салбарт ажиллаж буй залуус та бүхэнд ч бас сурах хөгжих, хийж бүтээх зүйл их байгааг илтгэж буй юм гэдгийг онцоллоо.

Мөн “Монгол Улсын ирээдүй бол өнөөдрийн залуучууд та бүхэн юм. Зам, тээврийн салбарт залуус та бүхний санал, санаачилга, чин хүсэл эрмэлзэл энэ салбарын хөгжлийг хурдасгаж, шинэ технологи, инновацийг нэвтрүүлэхэд залуусын идэвх оролцоо чухал хувь нэмэртэй. Зам тээврийн салбар нь нийгэм, эдийн засгийн хөгжилд стратегийн чухал ач холбогдолтой салбар. Зам тээвэр, дэд бүтэц хөгжиж байж улс орон хөгжинө. Тиймээс чуулганд оролцож буй залуус та бүхэн идэвх санаачлагатай, сэтгэлтэй зүтгэлтэй шударга хөдөлмөрлөж байж улс эх орон хөгжинө. Монголын залуучууд өнөөдөр шүүмжлэгч бус шийдэл гаргагч, манлайлагч байж, нийгэмд зөв үлгэр дуурайлал үзүүлж, бид хамтдаа зам тээврийн салбар болон улс эх орноо хөгжүүлнэ” хэмээн онцолж, чуулганы үйл ажиллагаанд амжилт хүслээ.

Эргэн сануулахад,

Салбарын залуучуудын санаачлагаар 2021 оны тавдугаар сарын 19-ний өдөр Нисэх, Авто зам, Авто тээвэр, Төмөр зам, Далайн тээвэр, Зам тээврийн хөгжлийн яам зэрэг Зам, тээврийн салбарын залуучуудын байгууллагууд нэгдэж салбарын залуучуудад мэдлэг олгох, төсөл хөтөлбөр хэрэгжүүлэх, хамтын ажиллагааг өргөжүүлэх зорилтын дор “Зам, тээврийн залуучуудын хөгжлийн зам зөвлөл”-ийг байгуулсан билээ.