Монгол Улсын Засгийн газрын гишүүн, Зам, тээврийн сайд Б.Дэлгэрсайхан Япон улсаас Монгол Улсад суугаа Элчин сайд Мсарү Игавахара болон Япон Улсын Олон Улсын Хамтын Ажиллагааны Байгууллага "ЖАЙКА"-гийн Монгол дахь төлөөлөгчийн газрын дарга К.Мияаги нарыг хүлээн авч уулзлаа.

Уулзалтаар талууд “Чингис хаан” нисэх онгоцны буудлыг өргөтгөх, хүчин чадлыг нэмэгдүүлэх ажлын хүрээнд хийгдэж буй судалгааны ажлыг эрчимжүүлэх, бүтээн байгуулалтын ажлыг эрт эхлүүлэх талаар харилцан санал  солилцлоо.

Тодруулбал, 2025 оны 06 сарын 06-нд Япон улсаас Монгол Улсад суугаа Элчин сайд Мсарү Игавахара болон "ЖАЙКА"-гийн Монгол дахь төлөөлөгчийн газрын дарга К.Мияаги, Япон Улсын “Ориентал Консалтантс Глобаль” компанийн төлөөлөл К.Такахаши нар судалгааны ажлын хүрээнд гаргасан урьдчилсан зураг төсөл, нисэх буудлын зүүн, баруун талыг өргөтгөх хэсэгчилсэн төлөвлөгөөг салбарын сайдад танилцуулсан юм.

Мөн нисэх буудлын зорчигч терминалыг шинээр барих эсвэл өргөтгөх, хөөрөх буух зурвасыг сунгах эсэх талаар болон хөрсний үзүүлэлт, барилгын ажилд тулгарч болох эрсдлүүд, цаг хугацааны тооцоолол,  зорчигч буух терминалыг зүүн, баруун тийш сунгах тухай асуудлаар дэлгэрэнгүй санал солилцсон билээ. 

Тэгвэл энэ удаагийн уулзалтаар "ЖАЙКА"-гийн Монгол дахь төлөөлөгчийн газрын дарга К.Мияаги судалгааны ажилд тусгасан төслийг хэрэгжүүлэхэд барилгын ажлыг 2028 онд эхлүүлж, 2034-2034 онд дуусгахаар төлөвлөж буйг салбарын сайдад танилцууллаа.  

Зам, тээврийн сайд Б.Дэлгэрсайханы зүгээс Монгол Улсын агаарын тээврийн салбарт зорчигч тээврийн урсгал эрчимтэй нэмэгдэж байгааг онцлоод, “Чингис хаан” нисэх буудлыг өргөтгөх, хүчин чадлыг нэмэгдүүлэх ажлыг харин ч аль болох төлөвлөснөөс ч илүү  богино хугацаанд хэрэгжүүлэх шаардлагатай байгааг онцолсон юм.

Мөн нисэх буудлын дэд бүтцийг өргөтгөх хүрээнд хийгдэж буй судалгааны ажлыг эрчимжүүлэх, төслийн урьдчилсан танилцуулгад Зам, тээврийн яам болон нисэхийн салбарын мэргэжилтнүүдийн саналыг тусгах,  суурь судалгааны урьдчилсан танилцуулгыг Зам, тээврийн яам 2025 оны 07 сарын 15-нд хүлээн авч танилцах хүсэлтэй байгаагаа илэрхийллээ.  

Уулзалтын төгсгөлд Зам, тээврийн сайд “Чингис хаан” нисэх буудлыг өргөтгөх бүтээн байгуулалтын барилгын ажлыг 2026-2027 онд эхлүүлэх хүсэлтэй байгаагаа уламжиллаа. 

Мөн Монгол Улсад аялал жуулчлал идэвхтэй хөгжиж,  агаарын тээврийн салбарт зорчигчдын тоо эрчимтэй нэмэгдэж байгаа зэрэг олон шалтгаан нөхцлийг харгалзан үзээд, Монгол, Япон хоёр улсын холбогдох байгууллагууд талаар харилцан санал солилцож, хамтран ажиллана. Хамтын ажиллагаа идэвхтэй, эрчимтэй урагшилна гэдэгт итгэж буйгаа илэрхийлэв.