Ховд-Улаангом чиглэлийн хатуу хучилттай авто замын бүтээн байгуулалтын ажил эхэллээ.

163 км урттай, улсын чанартай энэхүү автозамын зураг төсөл, хөрөнгө санхүү, тендер шалгаруулалтын олон шат дамжлагыг давж, өнөөдөр ийнхүү бодит ажил хэрэг болж байна.

Ховдыг Увстай холбох 163.3 км хатуу хучилттай авто замын барилгын ажлын нээлтэд Монгол Улсын УИХ-ын дарга Д. Амарбаясгалан, Засгийн газрын Хэрэг эрхлэх газрын дарга С.Бямбацогт, Монгол Улсын Засгийн газрын гишүүн, Зам, тээврийн сайд Б.Дэлгэрсайхан болон бусад холбогдох яамдын сайд, УИХ-ын гишүүд оролцож байна.

Энэхүү авто зам 2028 онд ашиглалтад орсноор:

• Аймгийн төвүүдийг хатуу хучилттай замаар холбох замаар бүс нутгийн тээвэр, логистикийн тогтолцоо шинэ түвшинд хүрч, хөгжлийн томоохон суурь тавигдана.
• Боршоо, Булган боомтыг холбох баруун бүсийн хоёр дахь тэнхлэгийн замын нэг хэсэг болж, улсын боомтын хөгжил, олон улсын тээврийн сүлжээтэй уялдах боломжийг нээнэ.
• Ховд, Увс аймгийн хэд хэдэн сумыг хамарч, орон нутгийн хөгжил, ард иргэдийн амьдралын түвшинд эерэг нөлөө үзүүлнэ.
• Увс аймгийн Өлгий, Өмнөговь сумын иргэд хатуу хучилттай авто замтай холбогдох боломжтой болохоос гадна Баруун бүсийн иргэдийн аюулгүй зорчих боломжийг хангах юм.

УИХ-ын дарга Д.Амарбаясгалан нээж, үг хэлэхдээ "Төслийн нийт төсөв нь 55.63 сая ам.доллар бол 2025 онд 5.56 сая ам.долларын санхүүжилт тавигджээ.  Монгол Улс Азийн Хөгжлийн банк хооронд байгуулсан санхүүжилтийн хөтөлбөр дагуу уг төсөл 2028 оны зургадугаар сарын 22-нд бүрэн ашиглалтад орох төлөвлөгдөж байна.

Аймгийн иргэдийн зүгээс уг авто замын бүтээн байгуулалтыг олон жил хүлээсэн, хатуу хучилттай авто замгүйн улмаас тээвэр явахад хүндрэлтэй, эвдрэл гэмтэл их тохиолддог талаар ярьж байна. Тиймээс уг зам ашиглалтад орвол юун түрүүнд тээврийн зардал буурахаас эхлээд зам дагасан худалдаа үйлчилгээ ч өргөжин тэлэх боломжтой" гэлээ.

Мөн баруун бүсийн иргэдийн хувьд зах зээл рүү буюу Улаанбаатар, Замын-Үүд орохын тулд 1500-2000 км-ыг туулдаг. Харин авто замын бүтээн байгуулалтуудыг ийнхүү даруй эхлүүлж чадснаар өөрсдийн гэсэн зах зээлтэй болж, боомтуудаараа дамжуулан хөгжих боломжтой юм.

Төслийн гүйцэтгэгч БНХАУ-ын Лонг жиан роуд энд Бридж ХХК-ийн хувьд Ховд-Говь-Алтай, Сонгино – Тосонцэнгэл зэрэг улсын болон аймгийн чанартай 4 авто замын нийт 800 гаруй км хатуу хучилттай авто замыг барьж ашиглалтад оруулсан туршлагатай аж. Уг бүтээн байгуулалтад 160 гаруй техник хэрэгсэлтэйгээр оролцож, 3 жилийн хугацаанд чанарын шаардлагад нийцсэн авто замаа хүлээлгэн өгөх юм байна.

Харин Зам, тээврийн сайд Б.Дэлгэрсайхан хэлэхдээ "Бид бүх аймгийн төвөө нийслэл Улаанбаатар хоттой хатуу хучилттай авто замаар холбож дууссан бөгөөд цаашид авто замын сүлжээг өргөжүүлэх чиглэлд бүтээн байгуулалтын томоохон зорилтууд дэвшүүлж аймгийн төвүүдийг хооронд нь болон хилийн боомттой хатуу хучилттай авто замаар үе шаттай холбох юм.

Энэхүү авто замыг барьснаар Мянгад-Наранбулаг-Улаангом чиглэлд зорчих хугацаа 37 хувиар буурж, Тээвэр, логистикийн өрсөлдөх чадварыг дээшлүүлэн ачаа тээврийн урсгалыг сайжруулна.

Мөн ард иргэд ая тухтай зорчих боломж бүрдэхийн зэрэгцээ тээвэр ашиглалтын  зардал буурна. Олон салаа замыг арилгаж, хөрсний элэгдэл, бэлчээрийн талхагдлыг эрс бууруулснаар байгаль орчинд эерэгээр нөлөөлнө. Аялал жуулчлал хөгжих таатай орчин бүрдэхийн зэрэгцээ ачаа болон зорчигч тээврийн нэвтрүүлэх хүчин чадлыг сайжруулан, экспортыг нэмэгдүүлэн, цаашид  транзит улс болох суурь нөхцөлийг бүрдүүлэх зэрэг ач холбогдолтой" хэмээн онцлов.