Ховдыг Увстай холбох 163.3 км хатуу хучилттай авто замын барилгын ажлын нээлт 2025 оны зургадугаар сарын 21-нд албан ёсоор эхэллээ. Нээлтийн ёслолд Монгол Улсын Засгийн газрын гишүүн, Зам, тээврийн сайд Б.Дэлгэрсайханы хэлсэн үгийг бүрэн эхээр нь хүргэж байна.

"Эрхэм хүндэт Монгол Улсын Их Хурлын дарга аа

Эрхэм хүндэт Зочид төлөөлөгчид өө

Эрхэм хүндэт замчид, Ховд аймгийн ард иргэд ээ

Та бүхний энэ өдрийн амгаланг айлтгая.

Өнөөдөр бид БҮС НУТГИЙН АВТО ЗАМ ХӨГЖҮҮЛЭХ ЗАСВАР АРЧЛАЛТЫН ТӨСӨЛ, III ҮЕ ШАТ-ны хүрээнд хэрэгжиж буй “Ховд – Улаангом” чиглэлийн 163 км хатуу хучилттай авто замын барилгын ажлыг эхлүүлэх гэж байгаадаа баяртай байна.

Зам, тээврийн  яамны эрхэм зорилго бол эдийн засгийн өсөлтийг хангах зам, тээвэр, логистикийн сүлжээг өргөжүүлэн хөгжүүлэх, хэрэглэгчийн эрэлт хэрэгцээнд нийцсэн, эдийн засгийн үр ашигтай, аюулгүй, ая тухтай тээврийн үйлчилгээний нөхцөлийг бий болгох явдал юм.

Түүхийг эргэн сөхөхөд 25 жилийн өмнө буюу 2000 онд Монгол Улс 1771.7 км хатуу хучилттай авто замтай байсан бол эдийн засгийн өсөлтийг хангах зам, тээвэр, логистикийн сүлжээг өргөжүүлэн хөгжүүлэх зорилтын хүрээнд  хуучин замуудыг шинэчлэн сайжруулахын зэрэгцээ хатуу хучилттай авто зам шинээр барьснаар одоогоор улсын чанартай 8835 км, тусгай зориулалтын 880 км хатуу хучилттай авто замын сүлжээтэй болоод байна.

Бид бүх аймгийн төвөө нийслэл Улаанбаатар хоттой хатуу хучилттай авто замаар холбож дууссан бөгөөд цаашид авто замын сүлжээг өргөжүүлэх чиглэлд бүтээн байгуулалтын томоохон зорилтууд дэвшүүлж аймгийн төвүүдийг хооронд нь болон хилийн боомттой хатуу хучилттай авто замаар үе шаттай холбох юм.  

Азийн хөгжлийн банкны зээлийн хөрөнгөөр хэрэгжиж буй тус бүс нутгийн авто зам хөгжүүлэх засвар арчлалтын төсөл хэрэгжсэнээр Ховд аймгийг Увс аймагтай, Завхан аймгийг Говь-Алтай аймагтай хатуу хучилттай авто замаар холбох бүтээн байгуулалтын ажил хийгдэх бөгөөд дээрх зорилтыг биелүүлэхэд ихээхэн үүрэг гүйцэтгэх юмаа. Мөн энэ чиглэлийн авто зам нь КАРЕК А4 коридор буюу Оросын Холбооны Улсын Хандгайт боомтоос БНХАУ-ын Такашикэн хүртэл урдаас хойш холбох чиглэлийн авто замын нэг хэсэг гэдгийг дуулгахад таатай байна.  

Энэхүү авто замыг барьснаар Мянгад-Наранбулаг-Улаангом чиглэлд зорчих хугацаа 37 хувиар буурж, Тээвэр, логистикийн өрсөлдөх чадварыг дээшлүүлэн ачаа тээврийн урсгалыг сайжруулна.  Мөн түүнчлэн ард иргэд ая тухтай зорчих боломж бүрдэхийн зэрэгцээ тээвэр ашиглалтын  зардал буурна. Олон салаа замыг арилгаж, хөрсний элэгдэл, бэлчээрийн талхагдлыг эрс бууруулснаар байгаль орчинд эерэгээр нөлөөлнө. Аялал жуулчлал хөгжих таатай орчин бүрдэхийн зэрэгцээ ачаа болон зорчигч тээврийн нэвтрүүлэх хүчин чадлыг сайжруулан, экспортыг нэмэгдүүлэн, цаашид  транзит улс болох суурь нөхцөлийг бүрдүүлэх зэрэг ач холбогдолтой юм.

Тус төслийн гүйцэтгэгчээр БНХАУ-ын  “Лонжиан Рөүд энд Бридж” ХХК мөн “Чайна Рөүд энд Бридж корпораци” шалгарч  нийт 3 багц ажилд 55,631,740.22 ам.долларын төсөвт өртөг бүхий гэрээ байгуулж 2025 оны 6 дугаар сарын 21-нээс 2028 оны 6 дугаар сарын 21-ний хооронд  Ховд Улаангомыг холбосон 163 км хатуу хучилттай авто замыг барьж байгуулна.Техник, технологийн хяналтын зөвлөхөөр Энэтхэг улсын “Родик Консалтантс” болон Монгол улсын “Эн Би Си Си” ХХК түншлэл ажиллахаар болсон.

Төслийг хэрэгжүүлэхэд Азийн Хөгжлийн Банкны дэмжлэг, мэргэжлийн туршлага, орон нутгийн засаг захиргаа, иргэдийн идэвхтэй хамтын ажиллагаа  ажлыг саадгүй түргэн шуурхай гүйцэтгэхэд  гол үүрэг гүйцэтгэнэ гэдэгт итгэлтэй байна.  

Энэ зам нь зөвхөн хөрш зэргэлдээ бүс нутгуудыг холбох төдийгүй, Монгол-Хятадын стратегийн түншлэлийг бэхжүүлэх, улс орны хөгжлийн “судас” болно гэдэгт эргэлзэхгүй байна.

Та бүхэндээ аз жаргал, сайн сайхан бүхнийг хүсэн ерөөе, алтан шар замын буян хишиг ашид мөнхөд ивээх болтугай" гэв.