Өмнөговь аймгийн "Гурван сайхан" нисэх буудлын хөөрч, буух хучилттай шинэ зурвасын нээлт боллоо. Тодруулбал, тус аймгийн ард иргэдэд агаарын тээврийн үйлчилгээг чанартай, хүртээмжтэй тасралтгүй үзүүлэх, говийн бүс нутагт үйлдэгддэг уул уурхай, аялал жуулчлалын хуваарьт болон захиалгат нислэгүүдийг эрчимжүүлэх зорилгоор Зам, тээврийн яам, “Иргэний нисэхийн үндэсний төв” ТӨХХК-ийн захилгаар “Гурвансайхан” нисэх буудлын аэродромын хөөрч буух хатуу хучилттай зурвас, явгалах замын шинэчлэлийн ажил дууслаа. Тус ажлыг 2025 оны дөрөвдүгээр сарын 21-ний өдрөөс зургадугаар сарын 15-ны өдрийг дуустал “Чамбай Зам” ХХК гүйцэтгэж, ашиглалтад хүлээн авч өнөөдөр буюу 2025 оны зургадугаар сарын 23-нд нээлтээ хийлээ.

Нээлтийн ёслолд Монгол Улсын Засгийн газрын гишүүн, Зам, тээврийн сайд Б.Дэлгэрсайхан, УИХ-ын гишүүн Н.Наранбаатар, “Иргэний нисэхийн үндэсний төв” ТӨХХК-ийн Гүйцэтгэх захирал Б.Отгонсүх болон Өмнөговь аймгийн Засаг дарга Н.Энхбат, “Гурвансайхан” нисэх буудлын дарга Х.Батболд, “Чамбай зам” ХХК-ийн үйл ажиллагаа хариуцсан захирал М.Хаш, нутгийн иргэд оролцлоо.

Нээлтийн үеэр Зам, тээврийн сайд Б.Дэлгэрсайхан үг хэлэхдээ "“Гурвансайхан” нисэх буудлыг 4D олон улсын нисэх буудал болгон өргөтгөх ажлыг орон нутгийн хөрөнгө оруулалтаар хэрэгжүүлэхээр зорьж байна. Монгол улсын Засгийн газраас гадаад, дотоодын аялал жуулчлалыг дэмжиж, нэгжилд авах жуулчдын тоог нэмэгдүүлэх бодлогын хүрээнд говийн бүс нутгийн дэдбүтэц, агаарын тээврийг хурдтайхөгжүүлэх ажил маш чухалд тооцогдож байна. Энэ том ажлын хүрээнд нэн тэргүүнд бид Өмнөговь аймгийн нисэхбуудлын аэродромын их засвар, шинэчлэлийн ажлыг 2025 оны 4 сарын21-ний өдөр эхлүүлж, 55 хоногийн хугацаанд багтаан амжилттай хийж дуусгалаа.

Цаашид дараа дараагийн аэродромуудыг маш богино хугацаанд барьж, томоохон бүтээн байгуулалтуудыг монголын замын компаниуд барьж чадна гэдгийг үүгээр баталж чадлаа.

Шинэ зурвастай болсноор нэн тэргүүнд аюулгүй байдал хангагдаж байгаа бөгөөд гадаад дотоодын жуулчдын урсгал нэмэгдэх эдийн засгийн эерэг үзүүлэлттэй" хэмээн онцлов.

Өмнөговь аймгийн “Гурвансайхан” нисэх буудлын аэродромын хөөрч буух хатуу хучилттай зурвас ашиглалтад орсноор нэг удаагийн нислэгээр 70 гаруй зорчигчийг тээвэрлэх хүчин чадал бүхий CRJ-700 маягийн агаарын хөлгийг хязгаарлалтгүй хүлээн авах, цаашлаад аэродромын үзүүлэлтэд нийцсэн шинэ төрлийн агаарын хөлгүүдээр нислэг үйлдэх боломж бүрдэж байна.