Төмөр замын тээврийн үйл ажиллагаанд хөдлөх бүрэлдэхүүний засвар, найдвартай аюулгүй үйл ажиллагаа хамгаас чухал байдаг. Тиймээс Зам, тээврийн сайд Б.Дэлгэрсайхан өнөөдөр (2025.06.23) Өмнөговь аймгийн Цогтцэций суманд байрлах “Монголын төмөр зам” ТӨХК-ийн харьяа ВАГОН ЗАСВАРЫН ДЕПО буюу зүтгүүрийн засварын төвийн үйл ажиллагаатай танилцлаа.

Энэхүү зүтгүүрийн депо нь Монгол Улсдаа хамгийн орчин үеийн тоног төхөөрөмжөөр тоноглогдсон, жилд 1500 гаруй ачааны вагонд дунд болон их засвар хийх хүчин чадалтай.

Бүтэц зохион байгуулалтын хувьд, техник үйлчилгээ, урсгал болон их засварыг хийх зориулалтаар барьж байгуулсан бөгөөд хоёр зам бүхий зэхэлтийн хэсэг, нэг үзлэгийн суваг бүхий бага засварын цех, хоёр үзлэгийн суваг бүхий их засварын цех гэсэн гурван томоохон хэсгээс бүрддэг.

Төмөр замын тээврийн салбарын тасралтгүй үйл ажиллагааг хангах, галт тэрэгний хөдөлгөөний аюулгүй байдлыг бүрэн хангах боломж нөхцөлийг бүрдүүлж хөдлөх бүрэлдэхүүнд их болон дунд засвар, үйлчилгээг хийдэг, Монголд хуруу дарам цөөхөн байдаг зүтгүүрийн засварын төв юм.

Тус төвийн үйл ажиллагаатай танилцах үеэрээ Зам, тээврийн сайд Б.Дэлгэрсайхан урд хөршид үйлдвэрлэгдсэн чанар, стандартын шаардлага, баталгаа хангахгүй вагонуудыг Монголд оруулж ирэхгүй байх, засварлахыг хориглох, төмөр зам дээр эвдрэл гэмтэл үүсэх эрсдлийг тооцоолж ажиллахыг санууллаа