Монгол Улсын Зам, тээврийн яамны Төрийн нарийн бичгийн дарга С.Батболд Бүгд Найрамдах Узбекистан улсын Тээврийн  тэргүүн дэд сайд М.Омаров тэргүүтэй төлөөлөгчдийг өнөөдөр (2025.06.24) хүлээн авч уулзлаа.

Уулзалтын эхэнд Төрийн нарийн бичгийн дарга С.Батболд төлөөлөгчдийг Монгол Улсад хүрэлцэн ирсэнд талархал илэрхийлээд, Монгол Улс, Бүгд Найрамдах Узбекистан Улсын тээврийн салбар дахь хамтын ажиллагаа жилээс жилд өргөжин хөгжиж буйд бид баяртай байдаг бөгөөд энэхүү уулзалт нь хоёр орны харилцааг бэхжүүлэх, тээвэр ложистикийн чиглэлээрх хамтын ажиллагааг улам идэвхжүүлэх чухал алхам гэж үзэж буйгаа онцоллоо.

Тэрбээр “Монгол Улсын Ерөнхийлөгч У.Хүрэлсүх, Бүгд Найрамдах Узбекистан Улсад 2024 оны 6 сард албан айлчлалын үеэр агаар болон автотээврийн хэлэлцээрийг байгуулсан. Мөн миний бие Узбекистан Улсын Хөрөнгө оруулалт, аж үйлдвэр, худалдааны дэд сайд Ильзат Аблахатовичтай уулзаж, хоёр талын хамтын ажиллагааны олон чухал асуудлыг хэлэлцэн, тодорхой санаачилгуудыг дэвшүүлж байсан” гэв.

Бүгд Найрамдах Узбекистан Улсын Засгийн газар, Монгол Улсын Засгийн газар хоорондын Олон улсын авто тээврийн тухай хэлэлцээрийг хэрэгжүүлэх хүрээнд 2025 оны 02 дугаар сарын 07-ны өдөр Узбекистан Улсын Ташкент хотноо, Монголын автотээврийн Хамтарсан хорооны хурлыг зохион байгуулж харилцан тохиролцсон асуудлаар хамтын ажиллагааны Протоколд  гарын үсэг зурсан.

Энэхүү Протоколын 5 дугаар заалтад “Олон улсын тээвэрлэлтэд зөвшөөрлийн бичиг  солилцох, ашиглахын хүрээнд E-permit-ийн тогтолцоог судлахтай холбоотой асуудлуудыг хэлэлцэв. Үүнтэй холбогдуулан 2025 оны хоёрдугаар улирлаас өмнө энэ чиглэлээр Бүгд Найрамдах Узбекистан Улсын туршлагыг судлах арга хэмжээг хэрэгжүүлэх”-ээр тусгасан.

Монголын тал зөвшөөрлийн бичгийг цахимаар солилцохыг дэмжиж байгаа тул Код солилцох зарчмаар хэрэгжүүлэх боломжтой гэж үзэж байна. Хил, Гааль, Хяналт хэрэгжүүлэх байгууллага, ажилтнуудад зохих техникийн бэлтгэлийг хангах, мэдээлэл солилцох боломжийг бүрдүүлэх шаардлагатай байна. Уг асуудлыг хариуцагч байгууллага “Монголын автотээвэрчдийн нэгдсэн холбоо” ТББ цахимаар зөвшөөрлийн бичиг солилцох талаар холбогдох байгууллагуудтай хамтран ажиллаж байна.

Узбекистаны тээвэрчид Азийн авто замын АН-4 сүлжээгээр олон улсын тээвэрлэлт гүйцэтгэхэд Монголын талаас асуудалгүй тул Хятадын нутгийн дэвсгэрээр дамжин тээвэрлэлт гүйцэтгэхийг тухайн улсын холбогдох байгууллагуудтай ярилцаж тохиролцох нь зүйтэй гэж үзэж байгаагаа хоёр тал илэрхийллээ.