Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.06.26) Бүгд Найрамдах Казахстан Улсын Ерөнхий сайдын орлогч, Гадаад хэргийн сайд Нуртлеу Мурат Абугалиевичыг хүлээн авч уулзан хамтын ажиллагааны талаар санал солилцлоо.

Талууд сүүлийн жилүүдэд хоёр улсын харилцаа, хамтын ажиллагаа, харилцан айлчлал идэвхжиж байгааг онцлоод, цаашид зам тээврийн салбар дахь хамтын ажиллагааг өргөжүүлж, автотээвэр, агаарын тээвэр, төмөр замын салбарт илүү өргөн хүрээтэй, уялдаа холбоотой хамтран ажиллах тухай хэлэлцлээ.

Тухайлбал, Зам, тээврийн сайд Б.Дэлгэрсайхан “ Монгол Улсын Гадаад харилцааны сайд Б.Батцэцэг Бүгд Найрамдах Казахстан Улсад албан ёсны айлчлал хийж, Азид хамтын ажиллагаа, итгэлцлийг бэхжүүлэх бага хурлын Гадаад хэргийн сайд нарын 6 дугаар уулзалтад оролцох үеэр тохиролцсоны дагуу Казахстан Улсын хуурай боомт, төмөр замын туршлага судлах асуудалд дэмжлэг үзүүлсэнд талархал илэрхийлье. Цаашид энэ чиглэлээр үргэлжлүүлэн хамтран ажиллах сонирхолтой байгаагаа илэрхийлье” гэлээ. 

Мөн хоёр улсын төрийн тэргүүний айлчлалаар 2024 онд Монгол, Казахстан улсыг холбосон тээврийн шинэ коридор, дөт замыг бий болгох боломжийг судалж, хэрэгжүүлэхээр  хэлэлцсэн. Энэ талаарх уулзалтыг Шанхайн хамтын ажиллагааны байгууллагын гишүүн орнуудын Тээврийн сайд нарын 12 дугаар уулзалтын үеэр гурван талт (Монгол, Орос, Казахстан) уулзалт зохион байгуулан хамтран хэлэлцэх саналыг дэвшүүллээ.

Автотээврийн салбарт мөн Монголын тээвэрчид 2025 оны 6 сарын байдлаар Казахын талаас олгосон ачаа тээврийн xоёр талын болон дамжин өнгөрөх тээвэрлэлт гүйцэтгэх 300 ширхэг зөвшөөрлийн бичгээс 225 ширхэг зөвшөөрлийн бичиг ашиглаад байгаа тул энэ төрлийн 200 ширхэг зөвшөөрлийн бичгийг нэмэлтээр авах хүсэлтийг албан бичгээр хүргүүлсэн” гэдгийг уламжиллаа.

Хоёр улсын Засгийн газар хооронд Агаарын харилцааны тухай хэлэлцээрийг 1992 онд байгуулсан. Энэ хэлэлцээрийн хүрээнд Монголын талаас Алматы чиглэлд "Хүннү Эйр" ХХК долоо хоногт 3 удаа нислэг үйлдэж байна.

Харин Казахстаны талаас нислэг үйлдэж буй агаарын тээвэрлэгч байхгүй байна. Нислэгийн тоон үзүүлэлтээс харахад Улаанбаатар-Алматы-Улаанбаатар чиглэлд 2024 онд нийт 22,126 зорчигч, 2025 оны эхний 5 сард  9751 зорчигч тээвэрлэсэн байна. Иймд цаашид   Казахстаны талаас Улаанбаатар чиглэлд агаарын тээвэрлэгч шууд нислэг үйлдэж эхэлсний дараа зах зээлийн багтаамж, зорчигч урсгалыг харгалзан нислэгийн багтаамж, давтамж нэмэх асуудлыг эргэн ярих саналтай байгаагаа илэрхийллээ.

Казахстан Улсын Ерөнхий сайдын орлогч, Гадаад хэргийн сайд Нуртлеу Мурат Абугалиевич хэлэхдээ “Юуны өмнө биднийг хүлээн авч уулзаж байгаад талархлаа илэрхийлье. Монгол Улсын шинэ Засгийн газрын бүтэц бүрдэхэд таныг Зам, тээврийн сайдаар дахин томилогдон ажиллах болсонд баяр хүргэе” гээд дэд бүтэц, байгууламжийг хөгжүүлэх чиглэлээр Казахстан улс бүх талаар хамтран ажиллах бүрэн боломжтойг тэмдэглэв.

Мөн "2024 онд Бүгд Найрамдах Казахстан Улсын Ерөнхийлөгч Монгол Улсад айлчлахдаа хоёр улсын зам тээврийн харилцаа, түүний дотор агаарын болон авто тээврийн харилцааг өргөжүүлэх, худалдаа, эдийн засаг, аялал жуулчлал, иргэдийн солилцоог нэмэгдүүлэх талаар хамтран ажиллахаа илэрхийлсэн. Тэр утгаараа өнөөдрийн миний айлчлал ч бас тээврийн салбарт хэд хэдэн чухал асуудлыг шийдвэрлэхийг зорьж байна. Тээврийн асуудлыг шийдвэрлэж чадвал цаашид олон салбар дахь хамтын ажиллагааг өргөжүүлж чадна гэдэгт итгэлтэй байна” гээд дэд бүтэц, байгууламжийг хөгжүүлэх чиглэлд  тодорхой сэдвээр санал солилцлоо.   

Энэ үеэр "Монгол, Казахстаны тээврийн салбарын харилцааг өргөжүүлэн хөгжүүлэх чиглэлд дамжин өнгөрөх тээвэрлэлтийн 200 зөвшөөрлийн бичгийг нэмж олгохоор болсон" гэдгийг тэмдэглэн хэллээ. Агаарын тээврийн харилцааны хүрээнд  Астана хотод нислэгийн маршрут нээх боломжтой гэдгээ илэрхийлэв. 

Уулзалтын төгсгөлд сайд нар Монгол, Казахстан хоёр улсын хамтын ажиллагааг өргөжүүлж, зам тээврийн салбарт олон чиглэлд хамтран ажиллахаа илэрхийллээ.