Зам, тээврийн сайд Б.Дэлгэрсайхан өнөөдөр (2025.06.30) Тяньжин хотноо Хятадын “Си Ар Си Си” компанийн удирдлагуудтай уулзаж, тус компанийн төв байранд зочиллоо.

Энэ үеэр Монгол, Хятад хоёр улсын харилцаа, хамтын ажиллагааг өргөжүүлэх хүрээнд Гашуунсухайт-Ганцмод боомтын хил холболтын бүтээн байгуулалтын төслийг хариуцлагатай, чанартай хийж гүйцэтгэх талаар харилцан санал солилцлоо.

Мөн “Си Ар Си Си” компанийн бүхий л цаг үеийн түүхийг гэрчлэх түүхийн баримт, эх сурвалж, сонин содон гэрэл зураг , амжилт бүтээл, өнгөрсөн одоо хослуулсан тус компанийн музей, үзэсгэлэнийн танхимтай танилцлаа.

Хятадын “Си Ар Си Си” компанийн удирдлагууд энэ үеэр дотооддоо болон дэлхийн улс орнуудад барьж буй бүтээн байгуулалтын ажлууд, өндөр хурдны галт тэрэг, хамгийн сүүлийн үеийн зам гүүрийн барилгын ажлуудаас танилцууллаа.

Гашуунсухайт-Ганцмод боомтын хил холболтын бүтээн байгуулалтын төслийн ажлын явцын талаарх мэдээллийг танилцуулав.

Зам, тээврийн сайд Б.Дэлгэрсайхан тус компанийн хамт олонд хандаж, хоёр улсын хил холболтын төмөр замын бүтээн байгуулалтад зам, барилга, гүүрийн угсралтын чиглэлээр дэлхийн хэмжээний 2 компани оролцсоноос Хятадын төмөр замын барилгын корпораци “СИ АР СИ СИ” шалгарч, өнөөдөр бүтээн байгуулалтын ажлыг гардан хийж байгаад талархаж буйгаа илэрхийллээ.

Мөн “Энэхүү Гашуунсухайт-Ганцмод боомтын төмөр замын бүтээн байгуулалт амжилттай хэрэгжих нь Монгол, Хятад улсын хооронд хоёр дахь төмөр замын гарц нээгдэж эдийн засгийн чухал ач холбогдолтой. Иймд бүтээн байгуулалтын ажлыг чанартай, хариуцлагатай хийхэд тулгамдаж буй асуудлыг тухай бүрт нь Зам, тээврийн яам болон Төмөр замын газар, Зам, тээврийн сайдын зүгээс шуурхай шийдвэрлэж, гар бие, сэтгэл нэгдэж, дэмжиж ажиллах болно” гэдгээ хэллээ.

Түүнчлэн Хятадын “Си Ар Си Си” компанийн зүгээс хүн хүч, тэрэг техник зэрэг зам гүүрийн ажлын бэлтгэл ажлыг шуурхай ханган ажиллаж байгаад дарга удирдлагуудад онцгойлон талархаж буйгаа илэрхийлсэн юм.

Барилгын ажилд нэн шаардлагатай тог цахилгаан, үйл ажиллагаа эрхлэх зөвшөөрлийн бичиг авах зэрэг бусад асуудлыг ЗТЯ-ны зүгээс шуурхай шийдвэрлэхээр шат шатанд нь ярилцаж буйгаа уламжлав.