БНХАУ-ын Тяньжин хотноо "Дэлхийн тогтвортой тээврийн форум-2025" олон улсын хурал зохион байгуулагдаж байна.

Уг форумд дэлхийн 30 орчим улс орны тээврийн сайд нар, тээврийн салбарын удирдах албан тушаалтнууд, БНХАУ-д суугаа дипломат төлөөлөгчид, бизнес эрхлэгчид, тээврийн салбарынхан чуулж байна.

Монгол Улсаас Засгийн газрын гишүүн, Зам тээврийн сайдаар ахлуулсан тээврийн салбарын удирдах албан тушаалтнууд , Сайдын зөвлөх Г.Гангаа, Засгийн газрын хэрэгжүүлэгч агентлаг Төмөр замын газрын дарга Б.Артур, Иргэний нисэхийн ерөнхий газрын дарга Э.Төрбаяр, ЗТЯ-ны Гадаад харилцааны хэлтсийн дарга Б.Нямдаваа, Б.Мөнх-Эрдэнэ нар оролцож байна.

Дэлхийн улс орнуудын зам тээврийн салбарынхан чуулсан тус форум энэ жил "Тогтвортой тээвэр: Дэлхийг холбогч логистик" сэдвийн дор өрнөж байгаа бөгөөд үндсэн хуралдаан дэлхий нийтийн тээврийн системд тулгамдаж буй асуудлуудыг хэлэлцэж, оролцогч талуудын тээврийн салбарын хамтын ажиллагааг бэхжүүлэхэд чиглэж байна.

Хуралдаанаар гурван асуудалд онцгой анхаарч хэлэлцэнэ. Эхнийх нь дэлхийн тогтвортой тээврийн хөгжил хийгээд хамтын ажиллагааны суурь баримт бичиг, хоёр дахь нь дэлхийн тогтвортой тээврийн хөгжлийн тайлан, гурав дахь нь дэлхийн тогтвортой тээврийн шилдэг туршлагын жишээг хэлэлцэх юм.

Уулзалтаар тээврийн салбарын удирдах албан тушаалтнууд нэгдсэн зөвшилцөлд хүрэх нь Дэлхийн тогтвортой тээврийн дээд хэмжээний дараагийн чуулга уулзалтыг зохион байгуулахад үндэс суурь болно гэдгийг албаныхан тодотгож байна.

Энэ жил бол Шанхайн хамтын ажиллагааны байгууллагын "Хятадын жил" юм. Тиймээс Хятад улс гол зохион байгуулагч орны хувьд “Дэлхийн тогтвортой тээврийн дээд хэмжээний чуулга уулзалт”-ыг зохион байгуулж байна.

Мөн Шанхайн хамтын ажиллагааны байгууллагын гишүүн орнуудын Тээврийн сайд нарын 12 дугаар уулзалтыг 2025 оны 6 дугаар сарын 30-наас 7-р сарын 2-ны өдрүүдэд Тяньжин хотноо хамтран зохион байгуулж байна.