Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2025.07.01) Бүгд Найрамдах Казахстан Улсын Тээврийн дэд сайд Калиакпаров Максат Каиржановичтай уулзлаа. (2025.07.01)

Талууд уулзалтаар хоёр улсын зам тээврийн салбар дахь хамтын ажиллагаа, хамтран ажиллах боломжууд, төсөл хөтөлбөрүүдийн талаар санал солилцлоо.

Уулзалтын эхэнд, Зам, тээврийн сайд Б.Дэлгэрсайхан “Эрхэм хүндэт Максат Каиржанович тантай Таньжин хотноо, ШХАБ-ын хурлын үеэр уулзаж байгаадаа баяртай байна.

Өнгөрсөн долоо хоногт Казахстан Улсын Гадаад хэргийн сайд Монгол Улсад айлчлах үеэр бид уулзаж, хоёр улсын тээврийн бүх салбарт шинээр хэрэгжүүлэх боломжтой ажлуудын талаар санал солилцсон.

Мөн энэ Шанхайн хамтын ажиллагааны байгууллагын гишүүн орнуудын Тээврийн сайд нарын 12 дугаар уулзалтын үеэр Монгол-Казахстан-Орос гурван улсаараа уулзалт хийж, тээврийн салбарын зарим асуудлыг хэлэлцэхээр тохирсон. Манай хоёр улсын иргэд олон жилийн түүхэн уламжлалт нөхөрсөг харилцааг бүх салбарт хөгжүүлсээр ирсэн бөгөөд тэр дундаа зам, тээврийн салбарын хамтын ажиллагаа чухал байр суурийг эзэлдэг гэдгийг дурдмаар байна” гээд салбарын бодлого чиглэл, хамтын ажиллагааны хүрээнд автотээвэр болон агаарын тээврийн салбарт хийж хэрэгжүүлж буй ажлуудыг танилцууллаа.

Тухайлбал, Монголын талаас одоо Алматы чиглэлд "Хүннү Эйр" ХХК долоо хоногт 3 удаа нислэг гүйцэтгэж байна. Харин Казахстаны талаас нислэг үйлдэж буй агаарын тээвэрлэгч байхгүй байна.

Нислэгийн статиктик үзүүлэлтээс харахад Улаанбаатар-Алматы-Улаанбаатар чиглэлд 2024 онд нийт 22,126 зорчигч, 2025 оны эхний 5 сард 9751 зорчигч тээвэрлэсэн байна. Казахстаны талаас Улаанбаатар чиглэлд агаарын тээвэрлэгч шууд нислэг үйлдэж эхэлсний дараа нислэгийн багтаамж, давтамж нэмэх асуудлыг эргэн ярих саналтай байна гээд харилцан санал солилцлоо.

Казахстан Улсын Тээврийн дэд сайд Калиакпаров Максат Каиржанович цаг зав гарган хүлээн авч уулзан элэгсэг дотноор ярилцсан Зам, тээврийн сайд Б.Дэлгэрсайханд талархал илэрхийлээд, хоёр орны харилцаа, хамтын ажиллагаанд сэтгэл ханамжтай байдгаа онцоллоо.

Уулзалтын төгсгөлд талууд цаашид зам тээврийн салбарт улам идэвхтэй хамтран ажиллана гэдэгт итгэлтэй байгаагаа илэрхийлэв.