Монгол Улсын Засгийн газрын гишүүн, Зам, тээврийн сайд Б.Дэлгэрсайханы БНХАУ-д хийх албан айлчлал үргэлжилж байна. (2025.07.02)

Тэрээр өнөөдөр БНХАУ-ын Тээврийн сайд Лю вэйтэй уулзаж, Монгол, Хятад хоёр улсын тээврийн салбарын хамтын ажиллагааны тухай ярилцлаа.

Уулзалтын эхэнд Зам, тээврийн сайд Б.Дэлгэрсайхан “Монгол, Хятад хоёр улсын харилцаа, хамтын ажиллагаа бүх салбарт өргөжин хөгжиж байна. Тэр дундаа хоёр улсын тээврийн салбарт хамтын ажиллагааг улам гүнзгийрүүлж, хоёр талын хооронд тулгамдаж буй олон асуудлыг шийдэж урагшлуулж чадсанд баяртай байна.

Тухайлбал, 2025 оны 02 дугаар сард Монгол Улсын Ерөнхий сайд Л.Оюун-Эрдэнэ Харбин хотноо БНХАУ-ын Төрийн зөвлөлийн Ерөнхий сайд Ли Чянтай уулзах үеэр “Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай” Монгол Улсын Засгийн газар болон БНХАУ-ын Засгийн газар хоорондын хэлэлцээрт гарын үсэг зурсан. Үүний үр дүнд өнөөдөр Гашуунсухайт-Ганцмод боомтын төмөр замын барилгын ажлыг эхлүүлээд байна” гэлээ.

Мөн Гашуунсухайт-Ганцмод боомтын төмөр замын бүтээн байгуулалт амжилттай хэрэгжих нь Монгол, Хятад улсын хооронд хоёр дахь төмөр замын гарц нээгдэх эдийн засгийн чухал ач холбогдолтой гээд энэхүү хил дамнасан төмөр замын гүүрэн байгууламжийг барих ажилд тулгамдаж буй зарим асуудлыг Монгол Улсын Засгийн газар, Зам, тээврийн яамны зүгээс шуурхай шийдвэрлэж ажиллах болно гэдгийг онцлон тэмдэглэлээ.

Энэхүү хил дамнасан гүүрэн байгууламжийг барьж дуусахаас өмнө бусад боомтын холболтын ажлыг шат дараатай эхлүүлэх саналыг Хятадын талд тавилаа.

Хоёр улсын тээврийн салбарыг хөгжүүлэхэд зорчигч болон ачаа тээврийн урсгалыг нэмэгдүүлэх боломжууд, автозам, автотээвэр, агаарын тээврийн салбарт хамтран шийдвэрлэвэл зохих зарим асуудлуудыг хэлэлцлээ.